«ក្រុងភ្នំពេញ»៖ លោក អ៊ូ តារា អគ្គលេខាធិការសហព័ន្ធគុនល្បុក្កតោ បានឲ្យនៅព្រឹកថ្ងៃទី១៩ ខែមេសា ឆ្នាំ២០១៩ ថា ជម្រើសជាតិគុនល្បុក្កតោ ២រូបបានចេញទៅផ្សព្វផ្សាយនៅសាធារណៈរដ្ឋកូរ៉េចំនួន ៣ខែ ដោយក្នុងនោះមានបណ្តាលប្រទេសចូលរួមចំនួន ក៏បានចូលរួមផងដែរ។
លោក អ៊ូ តារា បានបញ្ជាក់ឲ្យដឹងនៅលើបណ្តាញទំនាក់ទំនងសង្គមហ្វេសប៊ុករបស់លោកថា កីឡាករជម្រើសជាតិគុនល្បុក្កតោ ០២រូបបានធ្វើដំណើរទៅបង្ហាញ និងផ្សព្វផ្សាយក្បាច់គុនល្បុក្កតោ នៅសាធារណរដ្ឋកូរ៉េ រយៈពេល៣ខែ។
លោកបានបន្តថា កម្មវិធីនេះរៀបចំដោយ The MBC Arts Co.LTD ក្រោមការឧបត្ថម្ភគាំទ្ររបស់អង្គការ UNESCO. ក្នុងគោលបំណង លើកដំកើងក្បាច់គុនបុរាណ ពង្រឹងចំណងមិត្តភាព និងកិច្ចសហប្រតិបត្តិការនៃវប្បធម៌ និងសិល្បៈក្បាច់គុនរបស់ប្រទេសដែលចូលរួម និងជាពិសេសគឺការធ្វើឲ្យប្រសើរឡើងនៃសន្តិភាពអន្តរជាតិ តាមរយៈសិល្បៈក្បាច់គុន ជាមួយនិងការអភិវឌ្ឍន៍ប្រកបដោយនិរន្តរភាព។
លោកក៏បានបញ្ជាក់ផងដែរថា ក្បាច់គុនចូលរួមមាន Taekwondo Taekkyeon Capoeira wushu Silat Arnis និងគុនល្បុក្កតោ ហើយ ប្រទេសចូលរួមមាន កូរ៉េ ប្រេស៊ីល ម៉ាឡេស៊ី ហ្វីលីពីន និងកម្ពុជា៕
