ភ្នំពេញ៖ ក្រុមបាល់ទាត់របស់តារាកំប្លែង នាយពែកមី ក្នុងនោះមានសមាសភាពចូលរួមពី នាយគ្រឿន នាយក្តី លោក ហេង នរៈកក្កដា នឹងធ្វើដំណើរ ទៅកាន់ពហុកីឡដ្ឋានភ្នំពេញក្រោន RSN ដើម្បីប្រកួតជាមួយគ្រូបង្វឹក បុគ្គលិកក្លិបធំទុនធំមួយនេះ នាល្ងាចថ្ងៃទី៧ ខែធ្នូ ឆ្នាំ២០១៨ ដោយការប្រកួតនេះចាប់ពីម៉ោង ៦ និង៣០នាទី ។
ការប្រកួតរវាង ក្លិបភ្នំពេញក្រោន និង ក្រុមនាយពែកមី ក្នុងគោលបំណងដើម្បីរឹតចំណងមិត្តភាព រវាងកីឡា និងសិល្បករ នឹងបន្តធ្វើការផ្សព្វផ្សាយ ឲ្យយុវជនផ្តោតទៅលើកីឡា ជៀសវាងយកពេលវេលាទៅប្រើការអត់ប្រយោជន៍ ប៉ះពាល់ដល់សុខភាព និងសង្គមជាតិទាំងមូល ។
បើតាមនាយក្តី បានថ្លែងប្រាប់ OBN Asia ល្ងាចម្សិលមិញថា សម្រាប់ក្រុមបាល់ទាត់ នាយពែកមី មានរូបខ្ញុំបាទ បងគ្រឿន និង លោក ហេង នរៈកក្កដា និងមានវត្តមានកីឡាករក្នុងក្រុមជាច្រើនទៀត ។
នាយក្តី បានបញ្ជាក់ថា ការប្រកួតនេះ សម្រាប់ទស្សនិកជនអាចទៅទស្សនាដោយសេរី នៅលើទីលានធំរបស់ ពហុកីឡដ្ឋានតែម្តង ដោយមិនមានលក់សំបុត្រចូលទស្សនានោះទេ ។
គួរបញ្ជាក់ផងដែរថា សម្រាប់នាយក្តី បច្ចុប្បន្នកំពុងហ្វឹកហាត់ក្នុងសហគមន៍បាល់ទាត់ អាយុក្រោម ២០ឆ្នាំរបស់ភ្នំពេញក្រោយ ដោយត្រូវលេងជាខ្សែបម្រើ ក្នុងក្លិបធំយក្សប្រចាំតំបន់៕
