គ្រូបង្គោលរបស់តោខៀវ Chelsea លោក Maurizio Sarri បានប្រាប់អ្នកគាំទ្រក្លិបថា ត្រូវតែបង្ហាញសេចក្តីគោរពចំពោះ អតីតគ្រូបង្វឹក Jose Mourinho បន្ទាប់ពីការប្រកួតកាលពីថ្ងៃសៅរ៍ នៅពហុកីឡដ្ឋាន Stamford Bridge ។
គ្រាប់បាល់ទី២ របស់តោខៀវ នៅនាទី ៩៦ ដែលរកបានដោយ កីឡាករ Ross Barkley បានធ្វើឲ្យមានរឿងប៉ះទង្គិចយ៉ាងខ្លាំង ។
ជំនួយការគ្រូបង្វឹកតោខៀវលោក Marco Ianni បានអបអរគ្រាប់បាល់ទី២ នៅមុខលោក Jose ដែលជាហេតុធ្វើឲ្យមេដឹកនាំក្លិបបិសាចក្រហមរូបនេះ ខឹងសម្បារយ៉ាងខ្លាំង រហូតផ្ទុះកំហឹង ចង់ទៅវាយតប់ ប៉ុន្តែត្រូវកម្លាំងយាមការនៅទីនោះ ហាមឃាត់ទាន់ ។
លោក Jose ក៏បានលើកជាសញ្ញាម្រាមដៃចំនួនបី ទៅកាន់ ក្រុមអ្នកគាំទ្រតោខៀវ ដែលបង្ហាញថា អំឡុងពេលដែលគាត់ដឹកនាំនៅតោខៀវ បានជួយឲ្យក្លិបឈ្នះពាន លីគកំពូលចំនួនបី ។
ការពិភាក្សាលើការប្រកួតនេះលោក Sarri បាននិយាយថា លោក Mourinho នៅទីនេះគឺបានឈ្នះហើយ ដូច្នេះខ្ញុំគិតថាយើងត្រូវគោរពគាត់ សម្រាប់គ្រប់គ្នា ដែលគាត់បានជួយឲ្យក្លិបឈ្នះពាន។
លោក Sarri បានលើកឡើងពីការប៉ះទង្គិចនោះ ដោយបាននិយាយទៅកាន់ Jose និង សមាជិកវ័យក្មេងរបស់យើង ហើយក៏បានដោះស្រាយគ្នា ជាស្ថាពរ ។លោកថា ខ្ញុំបាននាំ Marco Ianni ទៅសុំទោស ហើយខ្ញុំគិតថារឿងនេះបានបញ្ចប់ហើយ ព្រោះថាយើងពិតជាខុស ព្រោះបានបង្កើត កំហុស៕
