ខ្សែបម្រើ Thiago Alcantara បានលើកឡើងថា ការរំពឹងទុក Zidane មកដឹកនាំក្លិប Bayern Munich វាគ្រាន់តែជាពាក្យចរចាមអារ៉ាមទេ ។
សម្រាប់ក្លិប Bayern Munich កំពុងរងសម្ពាធជាបន្តបន្ទាប់ ក្រោយក្លិបជើងខ្លាំងអាល្លឺម៉ង់រូបនេះ បានបរាជ័យ ៤ប្រកួតចុងក្រោយ របស់ពួកគេ ។
ក្រុមការពារតំណែងជើងឯកនេះ បច្ចុប្បន្នស្ថិតនៅលេខរៀងទី ៦ នៃតារាង ក្នុងក្របខណ្ឌ Bundesliga មាន ១៣ ពិន្ទុ ដោយចាញ់ Borussia Dortmund ចំនួន ៤ ពិន្ទុស្ថិតនៅកំពូលតារាង ។
Zidane ក្រោយពីជួយឲ្យ Real ឈ្នះពានChampions League ៣លើកជាប់ៗគ្នានោះ ត្រូវបានគេលើកឡើងថា នឹងទៅជំនួសតំណែងគ្រូបង្វឹក សញ្ជាតិក្រូអាត Niko Kovac ។
ទោះបីជាយ៉ាងណាក៏ដោយ តារាបាល់ទាត់អេស្ប៉ាញ Thiago បានប្រាប់ដល់ Cadena Ser ថា វាគ្រាន់តែពាក្យចរចាមអារ៉ាម ហើយចរចាមអារ៉ាម នៅតែចរចាមអារ៉ាម ។
កីឡាករខ្សែបម្រើរូបនេះបានបន្តថា នៅក្លិបនៅកីឡាករជើងចាស់ជាច្រើន ដែលចាត់ទុកជារឿងសំណាងល្អ ហើយយើងដឹងពីរបៀបដោះស្រាយ នូវបញ្ហានេះ យើងនឹងព្យាយាមធ្វើដើម្បីផ្លាស់ប្តូរ ស្ថានភាពនេះទៅមុខ ដោយព្យាយាមធ្វើអ្វីដែលមាននៅពេលនេះ ហើយការគិតរឿងអនាគតមិនមែនសម្រេចទាំងអស់នោះទេ ៕
