ខ្សែការពារតោខៀវ និងជម្រើសជាតិអេស្ប៉ាញ កីឡាករ Caesar Azpilicueta បានលើកឡើងថាកីឡាករ Eden Hazard របស់បែលហ្សិក គាត់មានសមត្ថភាពខ្ពស់ជាង Lionel Messi និង Ronaldo ដោយមិនចាំបាច់ផ្គូរផ្គងរកគ្រាប់បាល់ ៥០ គ្រាប់ក្នុងមួយរដូវកាល។
Azpilicueta បានប្រាប់កាសែត Daily Mail ថា ខ្ញុំស្គាល់អេដែន ដោយយើងបានលេងជាមួយគ្នាតាំងពីនៅបារាំង ខ្ញុំបានឃើញគាត់ ជាយូរណាស់មកហើយ តែខ្ញុំបានប្រាកដប្រជាថា គាត់ជាកីឡាករដ៏ល្អ បំផុត គាត់មានគុណសម្បត្តិទាំងការពារ និងប្រយុទ្ធតែម្តង ។វាគឺអស្ចារ្យ ណាស់ ប៉ុន្តែរដូវកាលនេះ គាត់បានទាំងស្វែងរកគ្រាប់បាល់ និង បញ្ចូនបាល់យ៉ាងល្អ ជូនដល់មិត្តរួមក្រុមដើម្បីរកគ្រាប់បាល់ ដោយមិនគិតពីប្រយោជន៍ខ្លួនឯង ។
កីឡាករខ្សែការពារខាងលើបានបន្ថែមថា Messi និង Ronaldo ពួកគេរកគ្រាប់បាល់បាន ៥០គ្រាប់ ក្នុងមួយរដូវកាល នោះវាជារឿងពិបាកក្នុងប្រទេសអង់គ្លេស ។ ប៉ុន្តែយើងងាកមកកាន់ អេដែនវិញ គាត់មានភាពខ្លាំងក្នុងប្រអប់សំខាន់ និងជួយឲ្យមិត្តរួមក្រុម រកគ្រាប់បាល់ទៀត គឺគាត់គិតក្រុមជាធំ។ គាត់គឺអស្ចារ្យ ដោយរកគ្រាប់បាល់ដោយជើងទាំងពីររបស់គាត់ ដែលជាគុណសម្បត្តិសាកសម ជាកីឡាករដ៏ល្អបំផុតលើពិភពលោក ជាពិសេសនោះមានឥរិយាបថល្អ។
គាត់ជាកីឡាករល្អបំផុតនៅក្នុងក្រុម តែគាត់គោរពមនុស្សគ្រប់គ្នា គាត់ជាមនុស្សធម្មតា ។ នោះជារឿងអស្ចារ្យណាស់ ហើយមនុស្សគ្រប់គ្នានៅក្នុង ក្លិបស្រលាញ់គាត់ណាស់ ហើយក៏ល្អណាស់ដែលបានធ្វើការជាមួយគាត់នៅលើទីលាន៕
