ក្រុមកាំភ្លើងធំបារម្ភថាពួកគេអាចបាត់បង់ William Saliba ក្នុងតម្លៃទាបនៅឆ្នាំក្រោយ ឬដោយឥតគិតថ្លៃនៅឆ្នាំ២០២៧ នៅពេលដែលកុងត្រារបស់គាត់ផុតកំណត់ ដោយមានរបាយការណ៍អះអាងថា Real Madrid មានផែនការចុះហត្ថលេខាយកគាត់ក្នុងរយៈពេលវែង។
នេះបើយោងតាមការចេញផ្សាយរបស់ The Athletic បានអោយដឹងថាប្រធានផ្នែកកីឡាថ្មីរបស់ក្លឹបភាគខាងជើងទីក្រុងឡុងដ៍គឺលោក Andrea Berta បានទាក់ទងទៅអ្នកតំណាងរបស់ខ្សែការពារ William Saliba រួចហើយ ទាក់ទងនឹងការបន្តកុងត្រាថ្មីនេះ។ ពួកគេមិនទាន់ផ្តល់លក្ខខណ្ឌថ្មីដល់គាត់នៅឡើយទេ ប៉ុន្តែសង្ឃឹមថានឹងមានការរីកចម្រើនក្នុងរយៈពេលប៉ុន្មានខែខាងមុខនេះ។
ក្លឹប Arsenal ត្រូវបានរាយការណ៍ថាជឿជាក់លើសមត្ថភាពរបស់គ្រូបង្វឹក Mikel Arteta ក្នុងការបញ្ចុះបញ្ចូល Saliba រួមជាមួយនឹងដៃគូខ្សែការពារកណ្តាល Gabriel Magalhaes និងខ្សែប្រយុទ្ធ Bukayo Saka ឱ្យចុះកិច្ចសន្យាថ្មីនៅកីឡដ្ឋាន Emirates ។ ការបន្តកុងត្រារបស់ Saka ត្រូវបាននិយាយថាជិតរួចរាល់ហើយ ប៉ុន្តែការចាប់អារម្មណ៍ពីអារ៉ាប៊ីសាអូឌីតទៅលើ Gabriel និងការតាមប្រមាញ់ Saliba របស់ Madrid ធ្វើឱ្យពួកគេព្រួយបារម្ភអំពីការបាត់បង់ខ្សែការពារ។
ក្លឹប Arsenal ឈរនៅលេខរៀងទី២ ក្នុងក្របខណ្ឌ Premier League ដោយនៅសល់បីប្រកួតទៀត ខណៈម្ចាស់ជើងឯករដូវកាលមុន Manchester City មានបីពិន្ទុតាមពីក្រោយពួកគេ។ កីឡាករ Saliba និងសមាជិកក្រុមមានបំណងជំរុញក្តីសង្ឃឹមរបស់ពួកគេក្នុងការដណ្តើមបានចំណាត់ថ្នាក់រងដោយយកឈ្នះម្ចាស់ជើងឯកថ្មី Liverpool នៅថ្ងៃអាទិត្យ៕
