ខ្សែប្រយុទ្ធវ័យជំទង់រូបនេះបានបញ្ចប់ការផ្ទេរទៅកាន់ Santiago Bernabeu នៅរដូវក្តៅឆ្នាំ២០២៤ បន្ទាប់ពីបានប្រារព្ធខួបកំណើតគម្រប់ ១៨ឆ្នាំរបស់គាត់។ គាត់ត្រូវបានគេចាត់ទុកថាជាអនាគតរបស់ក្លឹប ប៉ុន្តែត្រូវប្រឈមមុខនឹងការប្រកួតប្រជែងយ៉ាងខ្លាំងសម្រាប់ការស្វែងរកកន្លែងរបស់គាត់នៅក្រុមយក្សអេស្ប៉ាញជាមួយនឹងកីឡាករ Kylian Mbappe, Vinicius Junior និង Rodrygo។
កីឡាករ Endrick បានលេងត្រឹមតែ ៣៩នាទីសម្រាប់ការប្រកួតបាល់ទាត់ La Liga នៅរដូវកាលនេះ តាមរយៈការបង្ហាញខ្លួនជាកីឡាករជំនួសចំនួន ៧ដង និងស៊ុតបញ្ចូលទីបាន ២គ្រាប់នៅគ្រប់ការប្រកួតទាំងអស់។ ការពិភាក្សាអំពីការចាកចេញរបស់កីឡាករវ័យក្មេងក្នុងខែមករាត្រូវបានគេច្រាលចោល ប៉ុន្តែ Real ត្រូវបានគេនិយាយថាកំពុងពិចារណាជម្រើសរបស់ពួកគេឡើងវិញ។
នេះបើយោងតាមការចេញផ្សាយរបស់ Fichajes បានអោយដឹងថាកីឡាករ Endrick អាចនឹងត្រូវផ្លាស់ប្តូរនៅដើមឆ្នាំ ២០២៥។ ជាមួយនឹង Real ចង់ស្វែងរកពេលវេលាលេងលើទីលានអោយគាត់បន្ថែមទៀត ការផ្ទេរក្នុងលក្ខខណ្ឌខ្ចីជើងទៅកាន់ក្លឹបផ្សេងអាចត្រូវបានធ្វើឡើង។ មានក្លឹបជាច្រើននៅក្នុងតំបន់អឺរ៉ុបដែលបានសម្លឹងរកមើលការខ្ចីជើងកីឡាករវ័យក្មេងរូបនេះ។
វាត្រូវបានគេអះអាងថាកីឡាករ Endrick ដែលបានសារភាពថាជាអ្នកគាំទ្ររបស់ Sir Bobby Charlton អាចនឹងផ្ទេរទៅកាន់អង់គ្លេស ខណៈក្លឹប Tottenham មានការចាប់អារម្មណ៍លើគាត់។ ក្លឹបយក្សនៅក្របខណ្ឌ Serie A ក្លឹប Juve ក៏ត្រូវបានគេនិយាយថាចង់បានផងដែរ ខណៈដែលពួកគេស្វែងរកការបន្ថែមនៅក្នុងតំបន់ប្រយុទ្ធ ដើម្បីអាចប្រជែងចំណាក់ថ្នាក់នៅក្នុងប្រទេសអ៊ីតាលី៕
