ប្រធានក្លឹប Barcelona លោក Joan Laporta បានបង្ហាញទំនុកចិត្តថាក្លឹបនឹងអាចដោះស្រាយបញ្ហាផ្នែកហិរញ្ញវត្ថុរបស់ខ្លួន និងអាចចុះហត្ថលេខាលើកីឡាករថ្មី “ជាធម្មតា” នៅក្នុងទីផ្សារដោះដូរកីឡាករខែមករាខាងមុខនេះ។ លោក Laporta ធានាថា Barcelona ស្ថិតនៅលើផ្លូវដើម្បីបំពេញតាមច្បាប់ 1:1 របស់ La Liga នៅខែមករាដែលនឹងដោះស្រាយបញ្ហាការចុះឈ្មោះកីឡាករ។
លោក Laporta បានប្រាប់អ្នកយកព័ត៌មានថា៖ «យើងនឹងអាចចុះហត្ថលេខាលើកីឡាករជាធម្មតានៅក្នុងខែមករា ពីព្រោះយើងមានគម្រោងអំពីច្បាប់ 1:1 របស់ LaLiga មុនពេលនោះ»។
«នៅពេលអ្នកនិយាយថាចុះហត្ថលេខា យើងអាចចុះហត្ថលេខាលើកីឡាករ បញ្ហាគឺការចុះឈ្មោះជាមួយលីគ។ វានឹងកាន់តែងាយស្រួលនៅពេលដែលយើងឈានដល់ច្បាប់ 1: 1 »។
«សម្រាប់ពេលនេះ យើងមិនគិតពីកីឡាករណាម្នាក់ សម្រាប់ខែមករាទេ ពីព្រោះយើងសប្បាយចិត្តជាមួយនឹងក្រុមដែលយើងមាន។ ប៉ុន្តែ នាយកកីឡាលោក Deco និងក្រុមរបស់គាត់កំពុងធ្វើការយ៉ាងខ្លាំងដើម្បីវិភាគពីតម្រូវការរយៈពេលមធ្យម និងរយៈពេលវែង។ យើងពេញចិត្តនឹងអ្វីដែលយើងមាន Dani Olmo គឺជាអាទិភាព ហើយយើងបានចុះហត្ថលេខាជាមួយគាត់ ខ្ញុំបាននិយាយថា យើងអាចចុះហត្ថលេខាបានកីឡាករកំពូល ហើយវាបានបង្ហាញការពិត»៕
