គ្រូបង្វឹកក្រុមកាំភ្លើងធំ Arsenal លោក Mikel Arteta បានទទូចថាការបង្កើនទំនុកចិត្តរបស់ Kai Havertz គឺជាគន្លឹះនៃទម្រង់លេងដែលធ្វើអោយគាត់ប្រសើរឡើងសម្រាប់ក្រុម Arsenal ក្នុងប៉ុន្មានសប្តាហ៍ថ្មីៗនេះ។
បន្ទាប់ពីការចាប់ផ្តើមដ៏លំបាកក្នុងជីវិតនៅ Arsenal ពេលនេះ Havertz ហាក់ដូចជាបានប្រែក្លាយជាកីឡាករល្អម្នាក់នាពេលថ្មីៗនេះ ដោយស៊ុតបញ្ចូលទីបាន 4 គ្រាប់នៅក្នុងខែនេះ។ ថ្លែងទៅកាន់សារព័ត៌មានអំពីទម្រង់លេងរបស់ Havertz បន្ទាប់ពីកីឡាករអាឡឺម៉ង់ស៊ុតបញ្ចូលទីបានមួយគ្រាប់ទៀត ក្នុងជ័យជម្នះដ៏សំខាន់លើក្រុម Brighton កាលពីថ្ងៃអាទិត្យ អ្នកចាត់ការលោក Arteta បានទទូចថា ទំនុកចិត្តគឺជាគន្លឹះដែលនាំអោយកីឡាករចំណូលថ្មីឡើងជើង។
Arteta បាននិយាយថា៖ «នៅពេលមកដល់ដំបូង គាត់ហាក់គ្មានទំនុកចិត្តលើខ្លួនឯង ប៉ុន្តែពេលនេះយើងឃើញថា គាត់មានទំនុកចិត្តជាងមុននៅលើទីលាន។ ការពិតគាត់បានស៊ុតបញ្ចូលទីគ្រាប់បាល់ទីមួយរបស់គាត់ បានជួយអោយគាត់រកបានគ្រាប់ទីពីរ ហើយវាតែងតែធ្វើអោយគាត់កាន់តែមានទំនុកចិត្ត។ ប៉ុន្តែជារួម ការបង្ហាញសមត្ថភាពរបស់គាត់ គាត់មានភាពវៃឆ្លាត ជាពិសេសរបៀបដែលគាត់ការពារ និងបញ្ចប់ទី គាត់ពិតជាល្អណាស់»៕
