អ្នកចាត់ការក្រុម Arsenal លោក Mikel Arteta បានផ្តល់យោបល់ថា ក្រុមកាំភ្លើងធំរបស់គាត់នឹងត្រូវប្រជែងគ្នា ឬស្មើកំណត់ត្រាពិន្ទុ Premier League គ្រប់ពេល ដើម្បីដណ្តើមបានជើងឯកជាលើកដំបូងរបស់ពួកគេក្នុងរយៈពេល 20 ឆ្នាំក្នុងរដូវកាលនេះ។
កាលពីរដូវកាលមុន Arsenal បានប្រកួតប្រជែងយ៉ាងខ្លាំងសម្រាប់ពានលីគកំពូលអង់គ្លេស បន្ទាប់ពីបានក្លាយជាម្ចាស់ជើងឯកនៅឆ្នាំ 2003/04។ សម្រាប់រដូវកាលនេះក្រោយការប្រកួតចំនួន ១៥ ក្រុមកាំភ្លើងធំនៅតែបន្តឈរលើកំពូលតារាងហើយមាន ២ ពិន្ទុលើសក្រុម Liverpool ដែលជាក្រុមលេខ ២។
Arteta ត្រូវបានគេសួរពីគោលដៅរបស់គាត់ថា តើគាត់មានគោលដៅក្នុងការឈ្នះ Premier League ទេ? គាត់បាននិយាយថា៖ «បាទមាន ខ្ញុំគិតថាខ្ញុំនឹងឈ្នះលីកប្រសិនបើខ្ញុំមាន 96 ដល់100 ពិន្ទុ។ ហើយនោះជាពិន្ទុដែលក្រុមជាច្រើនធ្លាប់ធ្វើបាន»។
ដើម្បីសម្រេចបាន 96 ពិន្ទុនៅចុងបញ្ចប់នៃរដូវកាលនេះ ក្រុម Arsenal នឹងត្រូវការជាមធ្យម 2.63 ពិន្ទុក្នុងមួយប្រកួត លើការប្រកួតដែលនៅសល់ 24 ប្រកួតរបស់ពួកគេ។
Arsenal បានបញ្ចប់រដូវកាលមុនដោយមាន 84 ពិន្ទុ ហើយ Manchester City បានឈ្នះពានជាមួយនឹង 89 ពិន្ទុដែលជាលើកទី 2 ចាប់តាំងពីការឈ្នះដ៏គួរឱ្យភ្ញាក់ផ្អើលរបស់ Leicester ក្នុងឆ្នាំ 2016 ដែលក្រុមលើកពានមិនបានឈានដល់ 90 ពិន្ទុ៕
