ខ្សែប្រយុទ្ធ Erling Haaland បានបង្ហើបថា គាត់បានយកស្ទាយលេងតាមកំពូលកីឡាករ Cristiano Ronaldo ទាំងចលនា ចង្វាក់លេង រួមជាមួយនឹងការស៊ុតបញ្ចូលទី។
កីឡាករវ័យ 23 ឆ្នាំរូបនេះទើបតែបានបញ្ចប់ជាកីឡាករជើងឯករងសម្រាប់ពានរង្វាន់ Ballon d’Or ឆ្នាំ 2023 ប៉ុន្តែគាត់បានឈ្នះពាន Gerd Müller Trophy ដែលជាពានរង្វាន់សម្រាប់អ្នកស៊ុតបញ្ចូលទីដ៏ឆ្នើម ក្រោយគាត់រកគ្រាប់បាល់បានចំនួន 52 គ្រាប់គ្រប់ការប្រកួតទាំងអស់ជាមួយក្រុម Manchester City ។
សម្រាប់រដូវកាលនេះ Haaland នៅតែបង្ហាញភាពខ្លាំង ដោយស៊ុតបញ្ចូលទីបាន 17 គ្រាប់ក្នុងការបង្ហាញខ្លួន 18 ប្រកួតនៅគ្រប់ការប្រកួតទាំងអស់ ហើយការស្រេកឃ្លានមិនឈប់ឈរសម្រាប់គ្រាប់បាល់របស់គាត់ បានធ្វើអោយ Real Madrid និង Barcelona ចាប់អារម្មណ៍។
កីឡាករសញ្ជាតិន័រវេសរូបនេះបានប្រាប់ទូរទស្សន៍ TV2 ថា Ronaldo បានធ្វើឱ្យមានការចាប់អារម្មណ៍យ៉ាងខ្លាំង ជាពិសេសគាត់បានសារភាពថាគាត់បានយកស្ទាយលេងរបស់កីឡាកររូបនេះ។
Haaland បាននិយាយថា៖ «ខ្ញុំតែងតែមើលគាត់នៅលើ YouTube សម្រាប់ចង្វាក់លេងរបស់គាត់នៅក្នុងប្រអប់ ។ ហើយខ្ញុំចូលចិត្តការបញ្ចប់ទីពោពេញដោយកម្លាំង។ របៀបដែល Cristiano ផ្លាស់ទី និងរបៀបដែលគាត់គ្រប់គ្រងបាល់ គឺពិតជាអស្ចារ្យណាស់ ។ ខ្ញុំចាំថាគាត់បានផ្លាស់លេងក្លឹបយក្សដំបូង គឺក្រុមបិសាចក្រហម Manchester United មុនគាត់ផ្លាស់ទៅ Real Madrid ក្លាយជាកំពូលកីឡាករក្នុងប្រវត្តិសាស្ត្រ ។ ហើយថ្ងៃមួយខ្ញុំចង់ក្លាយជាអ្នកស្នងតំណែងកំណត់ត្រារបស់គាត់»។
បច្ចុប្បន្ន Haaland កំពុងក្លាយជាម៉ាស៊ីនរកគ្រាប់បាល់ដោយបានស៊ុតបញ្ចូលទីចំនួន 207 គ្រាប់ក្នុង 216 ប្រកួតសម្រាប់ក្លឹប និងប្រទេសគិតចាប់តាំងពីចូលរួមជាមួយក្រុម Red Bull Salzburg ក្នុង 2018៕
