ក្លឹប Napoli បានតែងតាំងលោក Walter Mazzarri ជាគ្រូបង្វឹកថ្មីរបស់ពួកគេ នេះបើតាមការបញ្ជាក់របស់ម្ចាស់ជើងឯក Serie A កាលពីថ្ងៃអង្គារ។ គ្រូបង្វឹកវ័យ 62 ឆ្នាំរូបនេះនឹងចូលជំនួសតំណែងលោក Rudi Garcia បន្ទាប់ពីចាញ់ Empoli ។
ការចាប់ផ្តើមរដូវកាលដ៏ខ្វះខាត បានឈានដល់កម្រិតទាបថ្មីមួយកាលពីថ្ងៃអាទិត្យ នៅពេលដែល Napoli បានចាញ់ 1-0 នៅទឹកដីរបស់ក្រុម Empoli ខណៈដែលយុទ្ធសាស្ត្ររបស់ Garcia បរាជ័យទល់នឹងក្រុមលេខរៀងទី 17 ក្នុងតារាង។
Garcia បានចូលកាន់តំណែងនៅ Napoli ក្នុងខែមិថុនា បន្ទាប់ពី Luciano Spalletti បានលាលែងពីតំណែងដោយបានជួយក្រុមអោយឈ្នះ Scudetto លើកដំបូងរបស់ Napoli ចាប់តាំងពីឆ្នាំ 1990 ប៉ុន្តែឥឡូវនេះពួកគេមានហានិភ័យ ក្នុងការធ្លាក់ចេញពីការប្រជែងដណ្តើមពាននៅរដូវកាលនេះ។
គួររំលឹកឡើងវិញផងដែរថាលោក Mazzarri បានត្រលប់មក Napoli ជាលើកទីពីរ បន្ទាប់ពីគាត់បានគ្រប់គ្រងក្រុមពីឆ្នាំ 2009 ដល់ឆ្នាំ 2013 ។ គាត់បានបញ្ចប់រដូវកាលដំបូងរបស់គាត់គឺ 2009-10 ក្នុងចំណាត់ថ្នាក់លេខ 6 មុនពេលគាត់បានជួយ Napoli មានសិទ្ធិប្រកួតវគ្គចែកពូលនៃ Champions League ក្នុងរដូវកាលបន្ទាប់៕
