លោក Pep Guardiola បានសារភាពថា គ្រាប់ទីពីររបស់ Bernardo Silva ក្នុងការយកឈ្នះ 6-1 លើក្រុម Bournemouth របស់ Manchester City បានធ្វើឱ្យគាត់នឹកឃើញដល់ Lionel Messi។
Silva ស្ថិតក្នុងទម្រង់លេងដ៏គួរឱ្យភ្ញាក់ផ្អើលសម្រាប់ Man City អំឡុងពេលទទួលជ័យជម្នះយ៉ាងត្រចះត្រចង់កាលពីថ្ងៃសៅរ៍ ដោយស៊ុតបានពីរគ្រាប់នៅកីឡដ្ឋាន Etihad។ គ្រាប់បាល់ទី 2 របស់កីឡាករសញ្ជាតិព័រទុយហ្គាល់គឺពិសេសខ្លាំងណាស់។
ថ្លែងក្រោយចប់ការប្រកួតលោក Guardiola បានសរសើរជាពិសេសទៅលើគ្រាប់ទី 2 របស់ Bernardo ដោយប្រដូចទៅនឹងការបញ្ចប់ទីរបស់ Messi ៖ «Silva ជាកីឡាករម្នាក់ដែលរកគ្រាប់បាល់ វាគឺជាជំហានបន្ទាប់ក្នុងអាជីពរបស់គាត់។ គាត់គឺជាកីឡាករដ៏ល្អមិនគួរឱ្យជឿ។ គ្រាប់ចុងក្រោយបានធ្វើឱ្យខ្ញុំនឹកឃើញ Messi តាមរបៀបដែលគាត់បង្ហាញវាពិតជាអស្ចារ្យ»។
លោក Guardiola ក៏បាននិយាយអំពីការបង្ហាញទម្រង់លេងដ៏អស្ចារ្យរបស់ Jeremy Doku ។ អ្នកចាត់ការរូបនេះបានសារភាពថា គាត់មានការភ្ញាក់ផ្អើលចំពោះរបៀបដែល Doku លេងដោយនិយាយថា៖ «គាត់បានធ្វើឱ្យយើងទាំងអស់គ្នាភ្ញាក់ផ្អើល គាត់ជាកីឡាករបាល់ទាត់ដ៏អស្ចារ្យម្នាក់។ ខ្ញុំតែងសង្កេតរាល់សកម្មភាពដែលគាត់ធ្វើ។ គាត់តែងតែបង្ហាញភាពអស្ចារ្យពេលដែលបាល់នៅជើងរបស់គាត់។ សព្វថ្ងៃវាពិបាករកកីឡាករ ដែលមានសមត្ថភាពលេងក្នុងចន្លោះតូចៗដូចជាគាត់ ហើយគាត់គឺជាកីឡាករម្នាក់ក្នុងចំណោមកីឡាករដែលមានលឿន។ វាមិនគួរឱ្យជឿ ពីរបៀបដែលគាត់ផ្លាស់ប្តូរចង្វាក់ក្នុងរយៈចំងាយប្រាំម៉ែត្រ។ បន្ទាប់ពីនោះគាត់ធ្វើការសម្រេចចិត្តបានយ៉ាងល្អ។ នោះហើយជាមូលហេតុសម្រាប់ខ្ញុំ ក្នុងការចុះហត្ថាលេខាលើគាត់»។
លោក Guardiola សង្ឃឹមថាអ្នកទាំងពីរនឹងបន្តទម្រង់លេងដ៏ល្អរបស់ពួកគេ នៅពេលដែល Man City ប៉ះក្រុម Young Boys ក្នុងក្របខ័ណ្ឌ Champions League និង Chelsea នៅ Premier League សប្តាហ៍ក្រោយ៕
