លោក Erik ten Hag និយាយថាវាជារឿងធម្មតាទេសម្រាប់ Marcus Rashford ក្នុងការធ្លាក់ទម្រង់លេងនៅដើមរដូវកាល។
កីឡាករវ័យ 25 ឆ្នាំរូបនេះមានភាពអន់ថយក្នុងរដូវកាលនេះ ដោយស៊ុតបញ្ចូលទីបានត្រឹមតែមួយគ្រាប់ក្នុង Premier League សម្រាប់ 7 ប្រកួត ហើយខកខានមិនបានស៊ុតបញ្ចូលទីក្នុងការប្រកួត Champions League ទាំងពីរប្រកួត។ បិសាចក្រហមបានជួបការលំបាក ទាំងការប្រកួតពានក្នុងស្រុក និងពាននៅតំបន់អឺរ៉ុប។
លោក Ten Hag និយាយថា គាត់មិនសប្បាយចិត្តចំពោះការលំបាកប៉ុន្មានសប្តាហ៍របស់ខ្សែប្រយុទ្ធរបស់គាត់ ដោយរំពឹងថា Rashford នឹងមានភាពល្អឡើងវិញក្នុងពេលឆាប់ៗខាងមុខនេះ។
Ten Hag បានប្រាប់សន្និសីទសារព័ត៌មានមុនការប្រកួត Manchester United ធ្វើជាម្ចាស់ផ្ទះទទួល Brentford ចុងសប្តាហ៍នេះថា៖ «វាជារឿងធម្មតា នេះមិនមែនជាលើកដំបូងសម្រាប់ Rashford ដែលមិនអាចរកគ្រាប់បាល់បាននៅដើមរដូវកាល។ គាត់មានបទពិសោធន៍ច្រើន ហើយនៅពេលដែលគាត់ស្វែងរកឃើញពីចំណុចល្អរបស់ខ្លួនមកវិញ នោះគាត់នឹងធ្វើវាបានច្រើន»៕
