លោក Mikel Arteta បាននិយាយថារបួសចុងក្រោយរបស់ Bukayo Saka គឺជាបញ្ហាដែលមានការព្រួយបារម្ភខ្លាំង ប៉ុន្តែគាត់មិនសោកស្តាយទេក្នុងការដាក់គាត់ឱ្យលេងសម្រាប់ការបរាជ័យ 2-1 ក្រោមថ្វីជើងក្រុម Lens ក្នុងពានរង្វាន់ Champions League ។
បន្ទាប់ពី Saka បានបញ្ជូនបាល់អោយ Gabriel Jesus ស៊ុតបញ្ចូលទ្រីគ្រាប់ដំបូងនៅនាទីទី 14 ។ គាត់លេងបានប្រហែល 20 នាទីស្រាប់តែគាត់មានបញ្ហាសាច់ដុំ ហើយត្រូវបានប្ដូរចេញភ្លាមៗ។
លោក Arteta បាននិយាយថា៖ «របួសរបស់ Saka គឺធំល្មមដែលមិនអាចបន្តការប្រកួតបាន ហើយនោះជាការព្រួយបារម្ភសម្រាប់ពួកយើង»។
ក្រោយមកលោក Arteta ត្រូវបានអ្នកសារព័ត៌មានសួរថា តើគាត់សោកស្តាយក្នុងការដាក់អោយ Saka លេងទល់នឹង Lens ដែរឬទេ គ្រូបង្វឹកក្រុម Arsenal បាននិយាយថា៖ «ទេ ខ្ញុំមិនសោកស្ដាយទេ ហើយគាត់ពិតជាល្អណាស់។ ដោយសារតែមានការសម្រុកខ្លាំងទើបបង្ករឲ្យមានរបួសបែបនេះ។ គាត់បានព្យាយាមយ៉ាងខ្លាំងនៅពាក់កណ្តាលតង់ទីមួយ ប៉ុន្តែក្រោយមកគាត់មានអារម្មណ៍ថាឈឺសាច់ដុំ។ ខ្ញុំមើលទៅគាត់មិនអាចបន្តបាន ដូច្នេះយើងត្រូវដកគាត់ចេញ»។
គួរបញ្ជាក់ផងដែរ Arsenal នឹងត្រូវលេងជាមួយ Man City នៅថ្ងៃអាទិត្យ ហើយ Arteta មិនចង់បាត់បង់តួអង្គដ៏សំខាន់បែបនេះ សម្រាប់ការប្រកួត Premier League នោះទេ៕
