ក្លឹប Barcelona បានបញ្ជាក់ថា ខ្សែបម្រើស្លាបប្រេស៊ីល Raphinha បានរងរបួសសរសៃពួរក្នុងជ័យជម្នះ 1-0 លើក្រុម Sevilla កាលពីយប់ថ្ងៃសុក្រ ហើយត្រូវអវត្តមានជាច្រើនប្រកួត។
ជុំវិញបញ្ហារបួសនេះ អ្នកចាត់ការ Xavi បាននិយាយថា៖ «យើងនឹងដឹងបន្ថែមទៀតអំពីរបួសរបស់ Raphinha នៅថ្ងៃស្អែក។ ខ្ញុំសង្ឃឹមថាគាត់មិនបញ្ហាធ្ងន់ធ្ងរ»។
សេចក្តីថ្លែងការណ៍របស់ក្លឹប Barcelona ចេញផ្សាយកាលពីថ្ងៃសៅរ៍បានសរសេរថា៖ «ការធ្វើតេស្តដែលបានធ្វើឡើងលើកីឡាករ Raphinha បានបង្ហាញថាគាត់មានរបួសសរសៃពួរនៅភ្លៅខាងស្តាំ។ ហើយមិនទាន់អាចកំណត់ការវិលត្រឡប់របស់គាត់វិញទេ»។
ខណៈដែល Barca មិនទាន់កំណត់ពេលវេលាសម្រាប់ការត្រលប់មកវិញរបស់ Raphinha របាយការណ៍នៅក្នុងប្រទេសអេស្បាញបានចុះផ្សាយថា កីឡាករសញ្ជាតិប្រេស៊ីលរូបនេះនឹងត្រូវអវត្តមានប្រហែលមួយខែ។ រយៈពេលនៃការអវត្តមាននោះ នឹងធ្វើឱ្យគាត់ខកខានការប្រកួតទល់នឹង Porto និង Shakhtar Donetsk សម្រាប់ការប្រកួតប្រជែង Champion League។
ដូច្នេះកីឡាករវ័យ ២៦ឆ្នាំរូបនេះអាចវិលត្រលប់មកវិញនៅក្នុងការប្រកួត El Clasico នៅចុងខែនេះ៕
