ក្រុមកាំភ្លើងធំ Arsenal ត្រូវបានគេរាយការណ៍ថាកីឡាករ Bukayo Saka, William Saliba និង Declan Rice នឹងអវត្តមានសម្រាប់ការប្រកួតថ្ងៃសៅរ៍ទល់នឹង Bournemouth ។ លោក Mikel Arteta បានបង្ហាញថាកីឡាករ 6 នាក់មិនអាចហ្វឹកហាត់បានក្នុងសប្តាហ៍នេះ ដោយសារបញ្ហារបួសផ្សេងៗ។
Gabriel Martinelli បានខកខានការប្រកួតបីលើកចុងក្រោយជាមួយនឹង Declan Rice ដែលរងរបួសនៅពាក់កណ្តាលតង់ អំឡុងពេលប្រកួតស្មើ 2-2 កាលពីថ្ងៃអាទិត្យជាមួយ Tottenham ។ Bukayo Saka ក៏បានរងរបួស នៅក្នុងការប្រកួត North London Derby ហើយ Leandro Trossard ក៏បានខកខានផងដែរ។
ថ្លែងនៅក្នុងសន្និសីទសារព័ត៌មានមួយកាលពីថ្ងៃសុក្រ Arteta បានបង្ហាញថា Saliba និង Fabio Vieira ក៏មានបញ្ហារបួសបន្តិចបន្តួចផងដែរ។
Arteta បាននិយាយថា៖ «Declan ,Saka ,Saliba ,Martinelli ,Vieira មិនទាន់បានហ្វឹកហាត់នៅឡើយទេ ខ្ញុំគិតថាវាជាពេលដែលពិបាកពំផុតសម្រាប់ពួកយើង។ យើងកំពុងរងចាំការវាយតម្លៃម្ដងទៀត ពេលទទួលបានលទ្ធផល យើងនឹងដឹងថាកីឡាករណាខ្លះ អាចបង្ហាញខ្លួននៅប្រកួតជាមួយ Bournemouth»។
នៅពេលសួរថាហេតុអ្វីបានជាវិបត្តិរបួសរបស់ Arsenal កើនឡើងក្នុងប៉ុន្មានសប្តាហ៍ថ្មីៗនេះ Arteta បាននិយាយថា៖ «វាមានហេតុផលផ្សេងគ្នា។ ខ្លះកើតឡើងក្នុងការហ្វឹកហាត់ ខ្លះមានបញ្ហាសាច់ដុំ»៕
