ក្លឹប Manchester United បានបញ្ជាក់ប្រាប់ថានឹងគ្មានខ្សែការពារស្តាំ Aaron Wan-Bissaka រយៈពេលជាច្រើនសប្តាហ៍ បន្ទាប់ពីគាត់បានរងរបួសនៅចុងម៉ោងក្នុងការប្រកួតចាញ់ Brighton & Hove Albion ។
បន្ទាប់ពីបានចាប់ផ្តើមការប្រកួត 4 លើកជាជម្រើសដំបូងរបស់ក្រុម កីឡាករ Wan-Bissaka បានក្លាយជាកីឡាករបម្រុងទល់នឹង Brighton ហើយគាត់បានប្ដូរចូលលេងនៅនាទីទី 85 ទាំងដែលគាត់កំពុងមានរបួស ។
ក្នុងអំឡុងពេលការបង្ហាញខ្លួនត្រឹម ៥ នាទីនោះ Wan-Bissaka បានរងរបួសសរសៃពួរ ហើយរបាយការណ៍ពីវេជ្ជបណ្ឌិតបានអោយដឹងថា គាត់នឹងអវត្តមានជាច្រើនសប្តាហ៍ ការរំពឹងទុកត្រូវបានកំណត់យ៉ាងហោចណាស់រយៈពេល 2 ខែ ។
ជាមួយនឹងកាលបរិច្ឆេទនៃការត្រលប់មកវិញនៅពាក់កណ្តាលខែវិច្ឆិកា ហេតុនេះ Wan-Bissaka អាចខកខានការប្រកួត Premier League ដល់ទៅ 7 ប្រកួត រួមទាំងការប្រកួត Manchester Derby នៅថ្ងៃទី 29 ខែតុលា ក៏ដូចជាការប្រកួតពានរង្វាន់ Champions League ចំនួនបួនប្រកួត ។
Man United ចាប់ផ្តើមការប្រកួតពានរង្វាន់អឺរ៉ុបរបស់ពួកគេទល់នឹង Bayern Munich នៅថ្ងៃពុធ ដោយ Diogo Dalot ត្រូវបានគេរំពឹងថាជាជម្រើសជំនួស Wan-Bissaka ។ អ្នកចាត់ការ Erik ten Hag កំពុងប្រឈមមុខនឹងការឈឺក្បាលជាខ្លាំង ខណៈដែល Wan-Bissaka ក្លាយជាកីឡាករម្នាក់ទៀតដែលត្រូវអវត្តមាន ។
គួរបញ្ជាក់ផងដែរ នៅក្នុងពេលនេះក្រុមបិសាចក្រហម Menchester United មានកីឡាករជាច្រើនរូបត្រូវអវត្តមានដោយបញ្ហារបួស ក្នុងនោះរួមមានកីឡាករ Luke Shaw , Tyrell Malacia , Kobbie Mainoo ,Mason Mount , Amad Diallo , Wan-Bissaka និងអ្នកចាំទី Tom Heaton ។ ហើយក៏អវត្តមាន Antony និង Jadon Sancho ដែរ។ ចំពោះ Antony កំពុងប្រឈមមុខនឹងការចោទប្រកាន់ពីបទរំលោភ ខណៈ Sancho ត្រូវបានបណ្ដេញចេញពីក្រុមដំបូង បន្ទាប់ពីបដិសេធមិនសុំទោសចំពោះការបង្ហោះតាមប្រព័ន្ធផ្សព្វផ្សាយសង្គមរបស់គាត់ដែលទាក់ទង លោក Erik Ten hag៕
