ភាពតានតឹងបានកើតឡើងរវាងខ្សែប្រយុទ្ធបារាំង Karim Benzema របស់ក្លឹបអារ៉ាប៊ីសាអូឌីត Al-Ittihad ជាមួយនឹងគ្រូបង្វឹកលោក Nuno Espírito Santo ដូចដែលបានរាយការណ៍ដោយ Asharq Al-Awsat ។
យោងតាមប្រភពដដែល បានបញ្ជាក់ថា គ្រូបង្វឹកសញ្ជាតិព័រទុយហ្គាល់ លើកឡើងថា កីឡាកររូបនេះ មិនសមនឹងទម្រង់លេងរបស់គាត់ទេ។ ដំបូងឡើយលោកមិនបានស្នើសុំទៅថ្នាក់ដឹកនាំក្លិប ក្នុងការផ្ទេរកីឡាករសញ្ជាតិបារាំងរូបនេះទេ។ ជាលទ្ធផល Benzema មានអារម្មណ៍មិនសប្បាយចិត្ត ហើយបាននិយាយថា គាត់ជាគ្រូបង្វឹកមានអាកប្បកិរិយា គ្មានវិជ្ជាជីវៈ។
កីឡាករ Benzema មានវ័យ 35 ឆ្នាំបានចូលរួមជាមួយ «Al-Ittihad» កាលពីខែកក្កដាឆ្នាំ 2023 ។ គាត់បានចូលរួមជាមួយក្លឹបអារ៉ាប៊ីសាអូឌីតពីក្លឹប Real Madrid លើការផ្ទេរដោយឥតគិតថ្លៃ។ គាត់បានលេង 6 ប្រកួតសម្រាប់ក្លឹបអារ៉ាប៊ីសាអូឌីតក្នុងការប្រកួតទាំងអស់ដោយស៊ុតបញ្ចូលទីបាន 3 គ្រាប់ និងAssists ពីរដង។ កិច្ចសន្យារបស់កីឡាករជាមួយក្លឹបមានសុពលភាពរហូតដល់រដូវក្តៅឆ្នាំ 2026។
គួរបញ្ជាក់ផងដែរ Benzema បានឈ្នះពានរង្វាន់ជាច្រើនក្នុងនោះរួមមាន La Liga ៤ ដង , Ligue 1 ៤ ដង , Copa del Rey ៣ ដង , Coupe de France ១ ដង , Spanish Super Cup ៤ ដង , French Super Cup ២ ដង , UEFA Champions League ៥ ដង, UEFA Super Cup ៤ ដង៕
