កីឡាករ Mohammed Kudus បានក្លាយជាគោលដៅផ្ទេរសម្រាប់ Arsenal និង Chelsea នៅរដូវក្តៅនេះ ប៉ុន្តែកីឡាករវ័យ 22 ឆ្នាំរូបនេះបានកំណត់ការទាមទារសំខាន់ៗចំនួនពីរទាក់ទងនឹងការចុះហត្ថាលេខាលើរូបគាត់ ។
Kudus បានបញ្ជាក់យ៉ាងច្បាស់ទៅកាន់ក្រុមដែលចង់បានគាត់ថា ក្រុមត្រូវធានាថាគាត់អាចបង្ហាញខ្លួនជាទៀងទាត់នៅលើទីលាន និងអាចអភិវឌ្ឍន៍ខ្លួនបន្ថែមទៀតក្នុងអាជីពជាកីឡាករបាល់ទាត់ បន្ទាប់ពីចាកចេញពី Ajax ។ កីឡាករវ័យ 22 ឆ្នាំរូបនេះត្រូវបានផ្សារភ្ជាប់ជាមួយនឹងតម្លៃផ្ទេរចំនួន 40 លានផោនទៅកាន់ក្របខ័ណ្ឌ Premier League នៅរដូវក្តៅនេះ ដោយគូប្រជែងនៅទីក្រុងឡុងដ៍ទាំងពីរមានចំណាប់អារម្មណ៍ក្នុងការចុះហត្ថលេខាលើរូបគេ។
កាលពីរដូវកាលមុន កីឡាករវ័យក្មេងរូបនេះបានស៊ុតបញ្ចូលទីចំនួន 18 គ្រាប់ និងបញ្ជូនបាល់ឱ្យមិត្តរួមក្រុមចំនួន 7 ដងក្នុងការបង្ហាញខ្លួន 40 ប្រកួតសម្រាប់ក្រុម Ajax ។
កិច្ចសន្យាបច្ចុប្បន្នរបស់ Kudus នឹងត្រូវផុតកំណត់នៅឆ្នាំ 2025 ប៉ុន្តែក្លឹបជាច្រើននៅទូទាំងទ្វីបអឺរ៉ុប កំពុងតាមដានស្ថានភាពរបស់គាត់នៅមុនរដូវកាលក្រោយ រួមមានក្លឹបជាច្រើនដូចជា Arsenal, Chelsea, Bayern Munich និង Paris Saint-Germain។ សមត្ថភាពរបស់កីឡាករវ័យ 22 ឆ្នាំក្នុងការលេងនៅតំបន់ប្រយុទ្ធ និងខ្សែបម្រើធ្វើឱ្យគាត់ក្លាយជាកីឡាករដែលទាក់ចិត្តលោក Mikel Arteta៕
