Real Madrid ត្រូវបានគេរាយការណ៍ថា បានយល់ព្រមលើកិច្ចព្រមព្រៀងសម្រាប់ Jude Bellingham។ ក្លឹបយក្សអេស្ប៉ាញគ្រោងនឹងចំណាយ 100 លានអឺរ៉ូសម្រាប់តារាឆ្នើមរបស់ Borussia Dortmund ហើយគាត់នឹងផ្លាស់ទៅនៅរដូវក្តៅនេះ។
យោងតាមរបាយការណ៍របស់ MARCA និង REVELO បានឲ្យដឹងថាក្លឹប Real Madrid និង Dortmund បានឈានដល់កិច្ចព្រមព្រៀងមួយសម្រាប់ការផ្ទេរ Bellingham ។ Los Blancos បានផ្តោតលើការបន្ថែមខ្សែបម្រើ ដើម្បីពង្រឹងក្រុមរបស់ពួកគេបន្ថែមទៀត។
ខណៈដែល Liverpool និង Manchester City ក៏ចាប់អារម្មណ៍ក្នុងការចុះហត្ថលេខា លើកីឡាករសញ្ជាតិអង់គ្លេសនៅរដូវក្តៅនេះ ប៉ុន្តែក្រុមនៅអង់គ្លេសទាំងពីរនេះ បានដកខ្លួនតាំងពីដើមរដូវកាលនេះ ដោយសារក្លឹបអាល្លឺម៉ង់ដាក់តម្លៃខ្ពស់ពេក។ ទន្ទឹមនឹងនេះដែរសំណើររបស់ក្លឹប Manchester City ត្រូវបានច្រានចោល ដោយពួកគេគិតថាវាជា «ក្លឹបផ្លាស្ទិច» នេះបើយោងតាមរបាយការណ៍របស់សារព័ត៌មាន BILD។
ខណៈពេលដែល Dortmund កំពុងសម្លឹងមើលការរក្សាកីឡាករអង់គ្លេសរូបនេះ ប៉ុន្តែត្រូវបានក្លឹប Real Madrid ជះលុយដើម្បីនាំខ្សែបម្រើសញ្ជាតិអង់គ្លេសចេញពីទឹកដីអាល្លឺម៉ង់៕
