អនាគតរបស់លោក Carlo Ancelotti នៅ Real Madrid នៅតែស្ថិតក្នុងភាពមិនច្បាស់ការ បន្ទាប់ពីចាញ់ Girona ក្នុងលទ្ធផល 4-2 ហើយការបង្ហាញទម្រង់លេងបែបនេះនៅក្នុង La Liga ក្នុងរដូវកាលនេះ ច្បាស់ណាស់ថាពួកគេនឹងបាត់បង់ឱកាសពីការប្រជែងដណ្តើមពាន La Liga។
អ្នកគាំទ្រក្រុម Real Madrid មានការខកចិត្តចំពោះការដឹកនាំរបស់លោក Ancelotti សម្រាប់ការប្រកួតក្នុងក្របខ័ណ្ឌ La Liga រដូវកាលនេះ បន្ទាប់ពីរដូវកាលមុនគឺជារដូវកាលដ៏អស្ចារ្យរបស់ក្រុមអធិរាជស ហើយអ្នកគាំទ្រជាច្រើន បានចោទជាសំណួរអំពីអនាគតរបស់គ្រូបង្វឹករូបនេះថា តើគាត់អាចនឹងចាកចេញពី Real Madrid ដែរឬទេ?
Ancelotti ពេលនេះមិនស្ថិតក្នុងក្រសែភ្នែកអ្នកគាំទ្រ Real Madrid ទៀតទេ។ ម្យ៉ាងវិញទៀត គាត់ត្រូវបានគេនិយាយថា គាត់ជាគោលដៅកំពូលរបស់ក្រុមជម្រើសជាតិប្រេស៊ីល ក្នុងការផ្លាស់ទៅធ្វើជាអ្នកគ្រប់គ្រងបន្ទាប់របស់ពួកគេ។ ដូច្នេះយើងអាចនិយាយថា អនាគតរបស់គាត់គឺមិនប្រាកដនោះទេ ថាគាត់ចាកចេញ ឬនៅបន្ត។
ដូចដែលបានរាយការណ៍ដោយ Foot Mercato បានអោយដឹងថាក្លឹប Real Madrid បានទាក់ទងជាមួយ Zidane រួចហើយ។ ក្លឹបនឹងស្វែងរកគ្រូបង្វឹកថ្មីសម្រាប់ក្រុម ប្រសិនបើ Ancelotti ផ្លាស់ទៅចូលរួមជាមួយក្រុមជម្រើសប្រេស៊ីល ។
Zidane បានរីករាយជាមួយនឹងជោគជ័យក្នុងនាមជាអ្នកចាត់ការទូទៅរបស់ Real Madrid ដោយបានដឹកនាំ Los Blancos ឈ្នះពានរង្វាន់ Champions League ចំនួន ៣ ដង ក៏ដូចជាពានរង្វាន់ជាច្រើនទៀត។ ថ្មីៗនេះគាត់ត្រូវបានផ្សារភ្ជាប់ជាមួយនឹងការងារនៅ PSG និង Juventus។
ទោះបីជាយ៉ាងណាក៏ដោយ ការវិលត្រឡប់ដ៏មានសក្តានុពលទៅកាន់ Santiago Bernabeu មិនត្រូវបានច្រានចោលនោះទេ ទោះបីជាកិច្ចព្រមព្រៀងអាចមានភាពស្មុគស្មាញបន្តិចក៏ដោយ៕
