បរទេស៖ ក្រោយពីចាញ់យ៉ាងអាម៉ាស់ក្នុងលទ្ធផល ៦ទល់នឹង១ នៅកីឡដ្ឋាន St James’ Park កាលពីថ្ងៃអាទិត្យកន្លងទៅ ដោយ ៥គ្រាប់ដំបូងរកបានដោយចំណាយពេលតែ ២១នាទីប៉ុណ្ណោះ។ លោក Stellini បានទទួលស្គាល់ថាគម្រោងរបស់គាត់មានកំហុស ដែលនេះបានក្លាយទៅជាសំណួរត្រូវបានចោទសួរថាតើគាត់អាចជាជម្រើសដ៏ត្រឹមត្រូវក្នុងការដឹកនាំក្រុមរហូតដល់ចុងរដូវកាលឬអត់។
បើយោងតាមការចេញផ្សាយរបស់ The Athletic បានអោយដឹងថាក្លឹប Spurs កំពុងពិចារណាលើការផ្លាស់ប្តូរមួយផ្សេងទៀត ដោយលោក Stellini នឹងត្រូវសម្រាប់ពីតួនាទីជាអ្នកចាត់ការបណ្តោះអាសន្ន។ ប្រសិនជាការសម្រេចចិត្តនេះបានធ្វើឡើងមែននោះ លោក Ryan Mason នឹងត្រូវមកទទួលតំណែងនេះម្តង។
គួរបញ្ជាក់ថា Stellini បានមកទទួលតំណែងនេះកាលពីថ្ងៃទី២៦ ខែមីនា ឆ្នាំ២០២៣ ក្រោយការចាកចេញរបស់លោក Antonio Conte។ ហើយគាត់ទើបតែដឹកនាំក្រុមឈ្នះបានម្តងប៉ុណ្ណោះ ក្នុងការដឹកនាំ ៤ប្រកួតរបស់ខ្លួន។ នៅពេលនេះ វាកាន់តែមានបញ្ហាទៀត ដោយក្លឹប Spurs អាចនឹងមិនស្ថិតក្នុងក្រុមទាំង ៤នៃកំពូលតារាង ក៏ដូចជាមិនមានសិទ្ធិក្នុងការលេងពាន Champions League នៅរដូវកាលក្រោយ៕
