ភ្នំពេញ៖ ជាមួយនឹងការចំណាយថវិកាបន្ថែម ប្រមាណជា ៧លានដុល្លារអាម៉េរិកថែមទៀត ដើម្បីចិញ្ចឹមកីឡាករ កីឡាការិនី មិត្តភក្ដិបរទេសដែលមកប្រកួតនោះ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន មានប្រសាសន៍ថា យើងរៀបចំការប្រកួតកីឡាស៊ីហ្គេមលើកនេះ ឱ្យគេហៅថា «ខ្មែរ ប្រទេសតូច ប្រទេសក្រ ក៏ប៉ុន្តែបេះដូងធំទូលាយជាងមហាសមុទ្រទៅទៀត»។
សម្ដេចតេជោនាយករដ្ឋមន្ត្រីបានថ្លែងដូច្នេះ ក្នុងខណៈដែលសម្ដេចតេជោ និងសម្ដេចកិត្តិព្រឹទ្ធបណ្ឌិត អញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបុណ្យបញ្ចុះខណ្ឌសីមាព្រះវិហារ ពុទ្ធាភិសេក និងឆ្លងសមិទ្ធផលនានាក្នុងវត្តព្រះបារមីវង្កតបុរី ស្ថិតនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ នៅព្រឹកថ្ងៃទី ២៤ ខែមេសា ឆ្នាំ ២០២៣។
សម្ដេចតេជោ ហ៊ុន សែន បានថ្លែងថា ឥឡូវនេះព្រះអគ្គិជ័យកីឡា យើងបានរត់ឆ្លងកាត់ចំនួន១០ប្រទេសរួចហើយ លើកលែងតែប្រទេសព្រុយណេសារុយសាឡឹម ដែលជាប់បុណ្យរ៉ាម៉ាដនមិនអាចទទួលបាន។ ទន្ទឹមនេះ ពេលចូលមកក្នុងប្រទេស យើងនឹងរត់ព្រះអគ្គិជ័យកីឡាពីខេត្តស្ទឹងត្រែង ឆ្លងកាត់មកកាន់ខេត្តក្រចេះ បន្តទៅខេត្តកំពង់ចាម ខេត្តកណ្ដាល និងចូលមករាជធានីភ្នំពេញ និង វិមានឈ្នះ ឈ្នះ។ បន្ទាប់មកនឹងមានការរត់បន្តគ្នានៅទីក្រុងភ្នំពេញ មុននឹងរត់ឆ្លងកាត់បណ្ដាខេត្តជុំវិញបឹងទន្លេសាប រួចចូលមកកាន់រាជធានីភ្នំពេញវិញ ដើម្បីបើកការប្រកួតកីឡាស៊ីហ្គេម។ សម្ដេចតេជោគូសបញ្ជាក់ថា៖ «អីចឹង យើងធ្វើម្ចាស់ផ្ទះឆ្នាំនេះ ដែលគេហៅថា អត់គិតថ្លៃទាំងអស់ សម្រាប់អ្នកដែលមកចូលរួមទស្សនា ទាំងប្រជាជនកម្ពុជា ទាំងជនបរទេស។ ខ្មែរលើកនេះ ធ្វើគឺថាឱ្យគេស្គាល់បេះដូងខ្មែរពិតប្រាកដ។ យើងចំណាយប្រមាណជា ៧លានដុល្លារអាម៉េរិកថែមទៀត ដើម្បីចិញ្ចឹមកីឡាករ កីឡាការិនី មិត្តភក្ដិបរទេសដែលមកប្រកួត ដែលតាមធម្មតាគេយក៥០ដុល្លារអាម៉េរិកដែលកីឡាករ កីឡាការិនី មកចូលរួមប្រកួត។ ឯយើងអត់ឱ្យបង់ថ្លៃទេ យើងទទួលបន្ទុកចិញ្ចឹមគេ។ ប៉ុន្តែសូមបញ្ជាក់ឱ្យហើយចំពោះអ្នកដែលមកគាំទ្រ ត្រូវបង់សណ្ឋាគារ និងសេវានានាដោយខ្លួនឯង យើងទទួលបន្ទុកតែកីឡាករ កីឡាការិនី និងគ្រូកីឡាតែប៉ុណ្ណោះ។»
សម្ដេចតេជោគូសបញ្ជាក់បន្ថែមថា យើងរៀបចំការប្រកួតកីឡាស៊ីហ្គេមលើកនេះ ឱ្យគេហៅថា «ខ្មែរ ប្រទេសតូច ប្រទេសក្រ ក៏ប៉ុន្តែបេះដូងធំទូលាយជាងមហាសមុទ្រទៅទៀត»។ សម្តេចតេជោនាយករដ្ឋមន្រ្ដីសង្ឃឹមថា ប្រទេសខ្លះ នៅពេល រៀបចំការប្រកួតស៊ីហ្គេម ក្រោយៗទៀត គេអាចគិតឃើញថា ដោយសារតែ កម្ពុជា មិនយកលុយពីកីឡាកររបស់គេដូច្នេះ គេអាចលើកលែង មិនយកលុយ ពីកីឡាករកម្ពុជាយើងវិញ ក៏ថាបាន។ យើងមិនបានបង្ខំគេទេ។ នេះជាសន្ដានចិត្ត ដែលយើងចង់ធ្វើ ព្រោះយើងយកលុយប៉ុណ្ណឹងមក ក៏វាមិនធ្វើឱ្យយើងក្លាយជាអ្នកមានបានដែរ ហើយបើយើងលក់សំបុត្រ ឱ្យប្រជាពលរដ្ឋចូលមើល ក៏វាមិនមិនក្លាយជាអ្នកមានដែរ ។ ផ្ទុយទៅវិញ ដាក់បន្ទុកលើប្រជាពលរដ្ឋ ដែលរង់ចាំអស់រយៈពេល ៦៦ ឆ្នាំរួចមកហើយ។
សម្តេចតេជោប្រមុខរាជរដ្ឋាភិបាល ក៏សូមអំពានាវប្រជាពលរដ្ឋ នៅទីក្រុងភ្នំពេញ និងនៅបណ្ដាខេត្ត ដែលមានទីតាំងប្រកួតកីឡា សូមមេត្តាយោគយល់ដល់ការរៀបចំនានា ដែលអាចមានការស្ទះចរាចរណ៍ខ្លះ៕
ប្រភព៖ ទីភ្នាក់ងារសារព័ត៌មានកម្ពុជា
