ខ្សែបម្រើ Bruno Fernandes របស់ក្លឹប Manchester United បានរិះគន់ខ្លាំងៗប្រឆាំងនឹងកាតាដែលធ្វើម្ចាស់ផ្ទះ FIFA World Cup 2022 ។
បន្ទាប់ពីជ័យជំនះក្រៅដី 2-1 របស់ Man Utd ទល់នឹង Fulham ក្នុងក្របខ័ណ្ឌ Premier League កាលពីថ្ងៃអាទិត្យ ទី13 ខែវិច្ឆិកា កីឡាករអន្តរជាតិព័រទុយហ្គាល់បានប្រាប់ Sky Sports ថា៖
«យើងដឹងពីបញ្ហាជុំវិញនៃការប្រកួតបាល់ទាត់ពិភពលោក យើងបានដឹងអំពីមនុស្សដែលបានស្លាប់ដោយសារការសាងសង់កីឡដ្ឋាន។ យើងមិនសប្បាយចិត្តចំពោះរឿងនោះទេ។ រឿងទាំងនេះខ្ញុំគិតថាមិនគួរកើតឡើងទាល់តែសោះ»។
គាត់បានបន្ថែម៖ «យើងចង់ឱ្យបាល់ទាត់ក្លាយជាកីឡាសម្រាប់មនុស្សគ្រប់គ្នា មនុស្សគ្រប់គ្នាត្រូវតែចូលរួមក្នុងព្រឹត្តិការណ៍ World Cup ពីព្រោះ World Cup គឺជាព្រឹត្តិការណ៍ធំបំផុតក្នុងពិភពលោក»។
គួររំលឹកឡើងវិញដែរថារបាយការណ៍របស់ Guardian កាលពីឆ្នាំ 2021 ដូចដែលបានរាយការណ៍ដោយ BBC បានបង្ហាញថា កម្មករចំនួន 6,500 នាក់មកពីប្រទេសឥណ្ឌា បង់ក្លាដែស ប៉ាគីស្ថាន និងប្រទេសផ្សេងទៀតបានស្លាប់នៅក្នុងប្រទេសកាតា ក្នុងអំឡុងពេលការងារសាងសង់កីឡដ្ឋានទាក់ទងនឹងការប្រកួតបាល់ទាត់ពិភពលោកឆ្នាំ 2022 ។
ទោះជាយ៉ាងណាក៏ដោយ រដ្ឋាភិបាលកាតាបានច្រានចោលតួលេខទាំងនោះ ដោយនិយាយថា ពួកគេបានកត់ត្រាការស្លាប់ត្រឹមតែ 37 នាក់ប៉ុណ្ណោះនៅចន្លោះឆ្នាំ 2014 ដល់ឆ្នាំ 2020 ដោយមានតែ 3 នាក់ប៉ុណ្ណោះក្នុងចំណោមពួកគេដែលបានបាត់បង់ជីវិតក្នុងអំឡុងពេលបំពេញការងារ៕
