អតីតខ្សែប្រយុទ្ធស្កុតឡែនលោក Frank McAvennie បានជំរុញឱ្យ Liverpool ស្វែងរកកីឡាករពីរនាក់ដើម្បីជំនួសកីឡាករបច្ចុប្បន្ននៅរដូវក្តៅក្រោយ។ McAvennie ជឿជាក់ថាខ្សែបម្រើ James Milner និង Jordan Henderson លែងល្អគ្រប់គ្រាន់ក្នុងការលេងឱ្យក្រុម Liverpool ដូចពេលមុនទៀតហើយ។
Milner បច្ចុប្បន្នមានអាយុ 36 ឆ្នាំ ហើយកំពុងស្ថិតក្នុងឆ្នាំចុងក្រោយនៃកិច្ចសន្យារបស់គាត់នៅ Anfield ដោយបានចុះហត្ថលេខាលើការបន្តរយៈពេលមួយឆ្នាំនៅរដូវក្តៅនេះ។ ទន្ទឹមនឹងនេះដែរ ប្រធានក្រុម Liverpool កីឡាករ Jordan Henderson ត្រូវបានចុះកិច្ចសន្យានៅ Anfield រហូតដល់រដូវក្តៅឆ្នាំ 2025 ប៉ុន្តែធ្វើមិនទាន់បានល្អបំផុតក្នុងយុទ្ធនាការនេះនោះទេ។
Milner បានបង្ហាញខ្លួន 15 លើកសម្រាប់ក្រុមហង្សក្រហមនៅគ្រប់ការប្រកួតទាំងអស់ក្នុងយុទ្ធនាការនេះ ខណៈដែល Henderson បង្ហាញខ្លួនបានត្រឹម 13 ប្រកួតសម្រាប់ Liverpool។
Frank McAvennie ចង់ឲ្យមានកីឡាករចំណូលថ្មីមកជំនួសអ្នកទាំងពីរនៅរដូវក្ដៅក្រោយ។ គាត់បានប្រាប់ Football Insider ថា៖ «Milner និង Henderson ត្រូវតែជំនួសដោយកីឡាករផ្សេងនៅចុងបញ្ចប់នៃរដូវកាលនេះ។ ពួកគេគឺជាខ្សែបំរើដ៏អស្ចារ្យ ប៉ុន្តែបច្ចុប្បន្នពួកគេមានវ័យចំណាស់ហើយ»។
អតីតខ្សែប្រយុទ្ធសញ្ជាតិស្កុតឡេនរូបនេះ ក៏បានទទូចថាគាត់ចង់ឃើញហង្សក្រហមរក្សាពួកគេនៅក្នុងក្លឹបនាពេលអនាគត។ គាត់បានបន្ថែមថា៖ «ប្រសិនបើពួកគេអាចរក្សា Milner និង Henderson នៅក្លឹបសម្រាប់មុខតំណែងផ្សេង វាពិតជាល្អណាស់»៕
