Manchester United បានចំណាយប្រាក់ 60 លានផោនក្នុងការបណ្តេញអ្នកចាត់ការទូទៅចេញពីក្លឹប ចាប់តាំងពីលោក Sir Alex Ferguson បានចាកចេញនៅចុងបញ្ចប់នៃយុទ្ធនាការ 2012/13 ។
ចាប់តាំងពីពេលនោះមកលោក David Moyes, Louis van Gaal, Jose Mourinho, Ole Gunnar Solskjaer និងលោក Ralf Rangnick សុទ្ធតែបានបរាជ័យក្នុងការបំពេញចន្លោះប្រហោងនៅ Old Trafford ។
ដោយសារតែការបរាជ័យនោះ អ្នកទាំងប្រាំបានសម្រាកពីភារកិច្ចរបស់ពួកគេ មុនពេលកិច្ចសន្យារៀងៗខ្លួនត្រូវបានបញ្ចប់ ហើយវាបានធ្វើឱ្យក្លឹបខាតបង់ប្រាក់យ៉ាងច្រើន។
The Athletic បានគណនាថាទឹកប្រាក់សរុបចំនួន 60 លានផោនត្រូវបានចំណាយលើការផ្តល់សំណងដល់អ្នកគ្រប់គ្រងខាងលើ។
ជាពិសេស 4.9 លានផោនត្រូវបានបង់ទៅឱ្យលោក Moyes 8.4 លានផោនត្រូវបានបង់ទៅឱ្យលោក Louis van Gaal និងបុគ្គលិករបស់គាត់ ហើយចំណាយអស់ 19.6 លានផោនដើម្បីបណ្តេញលោក Mourinho និងក្រុមការងាររបស់គាត់។
ចំនួនទឹកប្រាក់ខាងលើ បូករួមទាំងកញ្ចប់ប្រាក់បំណាច់ដែលផ្តល់ឱ្យលោក Solskjaer និងលោក Rangnick មានន័យថា Man Utd បានចំណាយប្រាក់យ៉ាងសន្ធឹកលើការបណ្តេញអ្នកគ្រប់គ្រងចាប់តាំងពីលោក Ferguson បានចាកចេញ។ The Athletic បានបន្ថែមថា Chelsea បានចំណាយ 38.8 លានផោន ហើយ Arsenal បានចំណាយ 27.9លានផោន និង Liverpool បានចំណាយ 15.7លានផោនលើការបណ្តេញអ្នកគ្រប់គ្រងរបស់ពួកគេរៀងៗខ្លួន ។
ទោះជាយ៉ាងណាក៏ដោយ អ្វីដែល Chelsea ចំណាយលើការបណ្តេញលោក Frank Lampard គឺមិនច្បាស់លាស់ ហើយដូច្នេះមិនត្រូវបានរាប់បញ្ចូលក្នុងចំនួនសរុបរបស់ពួកគេ ហើយក៏មិនបានរាប់ការចំណាយលើការបណ្តេញ Thomas Tuchel ផងដែរ។ តាមពិតទៅ វាអាចថា Chelsea បានចំណាយច្រើនជាង Man Utd។
តួរលេខសម្រាប់ Manchester City និង Tottenham ក៏មិនច្បាស់លាស់ដែរ។ ដោយសារ Manuel Pellegrini គឺជាអ្នកចាត់ការតែមួយគត់ដែលបានចាកចេញពី Man City ក្នុងអំឡុងពេលនេះ ការចំណាយសរុបរបស់ពួកគេទំនងជាមិនខ្ពស់ទេ ប៉ុន្តែ Spurs ក៏បានបណ្តេញអ្នកចាត់ការប្រាំមួយនាក់ចេញ ចាប់តាំងពីលោក Ferguson ចូលនិវត្តន៍៕
