ខ្សែការពារស្លាបរបស់ Inter កីឡាករ Denzel Dumfries បានសារភាពថាគាត់ត្រូវបានចាប់អារម្មណ៍ដោយ Chelsea និង Manchester United ប៉ុន្តែគាត់នៅតែប្តេជ្ញាចិត្តលេងឲ្យក្លឹបបច្ចុប្បន្នរបស់គាត់។
កីឡាករអន្តរជាតិហូឡង់ទើបតែបានចូលរួមជាមួយ Inter កាលពីរដូវក្តៅមុនពី PSV Eindhoven ប៉ុន្តែទទួលបានការចាប់អារម្មណ៍ក្នុងរដូវកាលដំបូងរបស់គាត់នៅ San Siro ដោយស៊ុតបញ្ចូលទីបាន 5 គ្រាប់ និងបញ្ជូនបាល់ឱ្យមិត្តរួមក្រុមបញ្ចប់ទីចំនួន 4 ដងសម្រាប់ក្រុមរបស់លោក Simone Inzaghi ។
យុទ្ធនាការដ៏គួរឱ្យចាប់អារម្មណ៍នេះបាននាំឱ្យមានទំនាក់ទំនងជាមួយ Chelsea និង Man Utd ដែលក្លឹបទាំងពីរកំពុងស្វែងរកការពង្រឹងទាំងខ្សែការពារស្លាប ឬខ្សែការពារស្តាំ។
ប៉ុន្តែនិយាយទៅកាន់ De Telegraaf កីឡាករ Dumfries បានលេងបដិសេធលទ្ធភាពនៃការផ្លាស់ប្តូរចេញពី Inter ដោយទទូចថាគាត់មានកុងត្រាមិនទាន់បញ្ចប់នៅក្នុងប្រទេសអ៊ីតាលី។
គាត់បាននិយាយថា៖ «ការចាប់អារម្មណ៍ពីក្លឹបផ្សេងធ្វើឱ្យខ្ញុំសប្បាយចិត្ត។ ប៉ុន្តែការផ្តោតអារម្មណ៍របស់ខ្ញុំគឺមានតែលើ Inter ប៉ុណ្ណោះ ។ យើងចង់ឈ្នះ Scudetto ពីព្រោះយើងបានចាញ់វាកាលពីរដូវកាលមុន»។
ទោះបីជាបានចំណាយរហូតដល់ 273 លានផោននៅក្នុងទីផ្សារដោះដូរកីឡាកររដូវក្តៅក៏ដោយ ប៉ុន្តែទីបំផុត Chelsea មិនបាននាំយកខ្សែការពារស្លាបស្តាំថ្មីទេ ដោយបានត្រឹមតែចុះហត្ថលេខាលើខ្សែការពារ Wesley Fofana, Kalidou Koulibaly និង Marc Cucurella ប៉ុណ្ណោះ។
ដូចគ្នានេះដែរ Man Utd មិនបានបន្ថែមខ្សែការពារស្តាំទេ បើទោះបីជាត្រូវបានផ្តល់ឱកាសក្នុងការចុះហត្ថលេខាទិញ Sergino Dest ពី Barcelona ក៏ដោយ៕
