យោងតាមការចេញផ្សាយរបស់ Diario AS បានឲ្យដឹងថាក្លឹប Chelsea កំពុងវាយតម្លៃលើបេក្ខភាពបីនាក់សម្រាប់តួនាទីនាយកកីឡារបស់ពួកគេ បន្ទាប់ពីលោក Christoph Freund របស់ RB Salzburg បានបដិសេធ។
ក្រុមតោខៀវបានចាប់អារម្មណ៍លើលោក Freund ប៉ុន្តែបុរសជនជាតិរអូទ្រីសរូបនេះបានបដិសេធមិនចូលរួមជាមួយក្លឹបនៅ Premier League ។
ដូច្នេះហើយ ក្លឹបភាគខាងលិចទីក្រុងឡុងដ៍កំពុងបង្វែរការចាប់អារម្មណ៍របស់ពួកគេទៅកាន់បេក្ខជនដែលមានសក្តានុពលផ្សេងទៀត ហើយគោលដៅដំបូងរបស់ក្លឹបតោខៀវគឺលោក Monchi ដែលជានាយកកីឡារបស់ក្លឹប Sevilla ។
បុរសសញ្ជាតិអេស្ប៉ាញរូបនេះបាននៅកីឡដ្ឋាន Ramon Sanchez-Pizjuan អស់រយៈពេល 5 ឆ្នាំដោយបានត្រលប់មកក្លឹបពី AS Roma វិញក្នុងឆ្នាំ 2017 ។
ក្នុងអំឡុងពេលរបស់គាត់ជានាយកកីឡារបស់ Sevilla គាត់បានចុះហត្ថលេខាកីឡាករមួយចំនួនដូចជា Jules Kounde, Diego Carlos និង Youssef En-Nesyri ។
នាយកកីឡារបស់ក្លឹប Borussia Dortmund លោក Michael Zorc គឺជាបេក្ខជនម្នាក់ទៀតដែល Chelsea កំពុងពិចារណា។
ការចុះហត្ថលេខាដ៏គួរឱ្យចាប់អារម្មណ៍របស់លោក Zorc រួមមានដូចជា Erling Haaland, Robert Lewandowski និងជាអ្នកនៅពីក្រោយការតែងតាំងលោក Jurgen Klopp ជាអ្នកគ្រប់គ្រងកាលពីឆ្នាំ 2008 ។
ចុងក្រោយ Chelsea កំពុងសម្លឹងមើលលោក Victor Orta របស់ Leeds United ដែលបានធ្វើឱ្យក្រុម West Yorkshire មានភាពល្អប្រសើឡើងវិញ ទៅជាក្រុមដែលអាចប្រជែងនៅ Premier League។
គាត់បានចូលរួមជាមួយ Leeds ក្នុងឆ្នាំ 2017 ហើយបាននាំយកដូចជា Raphinha, Kalvin Phillips និង Marc Roca ទៅកាន់ Elland Road ៕
