ភ្នំពេញ៖ ក្បាច់គុនព្រលឹងវប្បធម៌ខ្មែរ «គុនល្បុក្កតោ» ត្រូវបានប្រទេសក្នុងតំបន់អាស៊ីអាគ្នេយ៍ចំនួន៧ហើយ ដែលប្តេជ្ញាចិត្តខ្ពស់ក្នុងការហ្វឹកហាត់ ដើម្បីត្រៀមចូលរួមប្រកួតប្រជែងមេដាយ នៅក្នុងព្រឹត្តិការណ៍ កីឡាស៊ីហ្គេមលើកទី៣២ ឆ្នាំ២០២៣ ដែលជាប្រវត្តិសាស្ត្រដំបូងរបស់ព្រះរាណាចក្រកម្ពុជា។
កីឡាគុនល្បុក្កតោ ត្រូវបានដាក់បញ្ចូលនៅក្នុងចង្កោមយុទ្ធគុនចម្រុះ ក្នុងស៊ីហ្គេម ឆ្នាំ២០២៣ បន្ទាប់ពីបានអនុម័តជាផ្លូវដោយកិច្ចប្រជុំក្រុមប្រឹក្សាកីឡាសហព័ន្ធកីឡាអាស៊ីអាគ្នេយ៍ កាលពីថ្ងៃទី១៣ ខែកក្កដា ឆ្នាំ២០២២ ដែលកម្ពុជាទទួលធ្វើម្ចាស់ផ្ទះ ហើយក្នុងនាមជាប្រធានក្រុមប្រឹក្សាកីឡា សហព័ន្ធអាស៊ីអាគ្នេយ៍ ដែលដឹកនាំដោយឯកឧត្តមបណ្ឌិត ថោង ខុន ប្រធានគណៈកម្មាធិការ ជាតិអូឡាំពិកកម្ពុជា និងជាអនុប្រធានអចិន្ត្រៃយ៍ គណៈកម្មាធិការជាតិ CAMSOC។ ជាផ្លូវការកីឡា ចំនួន៣៩ប្រភេទ បូកនឹងកីឡាសម្ដែង (Demonstration Sport) ១ប្រភេទត្រូវបានអនុម័ត។
នៅក្នុងបទសម្ភាសន៍ កាលពីថ្ងៃទី១៤ ខែកក្កដា ឆ្នាំ២០២២ ក្រោយបញ្ចប់កិច្ចពិភាក្សា និងចុះហត្ថលេខាជាមួយតំណាងសមាគមកីឡាបញ្ចសិលាឥណ្ឌូណេស៊ី និងតំណាងស្ថានទូត ឥណ្ឌូណេស៊ី នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ឯកឧត្តម វ៉ាត់ ចំរើន អគ្គលេខាធិការ NOCC និងជាអគ្គលេខាធិការ CAMSOC បានលើកឡើងថា ពេលនេះ មានប្រទេស៦ ទៅ៧ ហើយត្រៀមចូលរួមប្រកួតកីឡាគុនល្បុក្កតោ ដែលត្រូវបានដាក់បញ្ចូ ល ក្នុងចង្កោមនៃយុទ្ធគុន ចម្រុះ សម្រាប់ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។ ឯកឧត្តមមានប្រសាសន៍ថា ពេលនេះ ភាគីទាំងពីរបានចុះហត្ថលេខាលើកំណត់ត្រា នៃដំណើរ ការផ្លាស់ប្តូរគ្នារវាងក្បាច់គុនល្បុក្កតោរបស់កម្ពុជា និងបញ្ចសិលារបស់ឥណ្ឌូណេស៊ី ហើយបាន កំណត់ពេលវេលាក្នុងការបញ្ជូនក្រុមកីឡាករ កីឡាការិនីកម្ពុជាចេញទៅហ្វឹក ហាត់កីឡា បញ្ចសិលា និងរៀបចំគ្រូបង្វឹកកីឡាគុនល្បុក្កតោរបស់កម្ពុជាទៅបង្ហាត់ដល់កីឡាករ កីឡាការិនីឥណ្ឌូណេស៊ី ដែលក្បាច់គុនទាំងពីរនេះនឹងត្រូវរៀបចំការប្រកួតនៃយុទ្ធគុនចម្រុះ សម្រាប់ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា។
ឯកឧត្តម វ៉ាត់ ចំរើន បន្ថែមទៀតថា នេះជាអត្ថប្រយោជន៍ដ៏សំខាន់សម្រាប់កម្ពុជា ក្នុងការបញ្ជ្រាប ក្បាច់គុនព្រលឹងជាតិមួយនេះទៅក្នុងប្រទេសឥណ្ឌូណេស៊ី ដែលឥណ្ឌូណេស៊ីនឹងបង្កើតឱ្យមាន ជាសហព័ន្ធកីឡាគុនល្បុក្កតោឥណ្ឌូណេស៊ី។ «នេះក៏ជាការពង្រីកសក្តានុពល របស់គុនល្បុក្កតោកម្ពុជាបន្ថែមទៀត ទៅកាន់តំបន់អាស៊ីអាគ្នេយ៍ ក្នុងការត្រៀមរៀបចំស៊ីហ្គេម ឆ្នាំ២០២៣ ដោយពេលនេះមាន៦ទៅ៧ប្រទេសហើយ»។ តាមគម្រោង នាដើមខែសីហាខាងមុខនេះ កម្ពុជានឹងបញ្ជូនអត្តពលិក៣០នាក់ទៅហ្វឹក ហាត់បញ្ចសិលា នៅឥណ្ឌូណេស៊ី រហូតដល់ជិត ស៊ីហ្គេម ២០២៣តែម្តង។
ក្នុងដំណើរត្រៀមស៊ីហ្គេម ២០២៣នេះ កម្ពុជាក៏មានផែនការ នៅចុងឆ្នាំ២០២២ ឬដើមឆ្នាំ២០២៣ នឹងទទួលរៀបចំការប្រកួត កីឡាជើងឯកគុនល្បុក្កតោ និងបញ្ចសិលាអាស៊ីអាគ្នេយ៍ ដើម្បីតេស្តសមត្ថភាពកីឡាករ កីឡាការិនី និងមន្ត្រីរៀបចំការប្រកួតនៃប្រភេទកីឡាយុទ្ធគុនទាំងពីរនេះឱ្យកាន់តែមុតស្រួចបន្ថែមទៀត។ «នេះជា លទ្ធផលផ្លែផ្កា ដើម្បីគាំទ្រដល់ដំណើរការហ្វឹកហាត់ឱ្យរលូន បន្ទាប់ពីការចុះអនុស្សរណៈនៃការ យោគយល់គ្នា កាលពីខែមុនរវាងកម្ពុជា និងប្រធានសហព័ន្ធកីឡាបញ្ចសិលាពិភពលោក និងជារដ្ឋមន្ត្រីក្រសួងការពារជាតិឥណ្ឌូណេស៊ី នៅក្នុងជំនួបសវនការជាមួយសម្តេចតេជោ ហ៊ុន សែន»។
គួររម្លឹកថា សម្តេចតេជោ ហ៊ុន សែន ក៏បានជំរុញបន្ថែម ចំពោះការអភិរក្សកម្រិតបច្ចេកទេសកីឡា ទាំងល្បុក្កតោខ្មែរ និងយុទ្ធគុនឥណ្ឌូណេស៊ីនេះ ដែលទទួលបានការឯកភាពជួយពីឯកឧត្ដមរដ្ឋមន្ត្រី ការពារជាតិឥណ្ឌូណេស៊ី កាលពីថ្ងៃទី១១ ខែកក្កដា ឆ្នាំ២០២២ ក្នុងឱកាសដែល សម្តេចតេជោ អញ្ជើញផ្តល់កិត្តិយសដ៏ខ្ពង់ខ្ពស់ថ្លែងបើកកិច្ចប្រជុំក្រុមប្រឹក្សាសហព័ន្ធកីឡាអាស៊ានប៉ារ៉ា និងក្រុម ប្រឹក្សាសហព័ន្ធកីឡាអាស៊ីអាស៊ីអាគ្នេយ៍ នៅភ្នំពេញ៕
ប្រភព៖ ក្រសួងព័ត៌មាន
