កីឡាករចំណូលថ្មីរបស់ Liverpool វ័យ 19ឆ្នាំ Fabio Carvalho បានធ្វើការអះអាងយ៉ាងមុតមាំ បន្ទាប់ពីក្រុមរបស់គាត់ត្រូវបានក្រុម Manchester United លត់យ៉ាងចាស់ដៃ 4-0 ក្នុងការប្រកួតមិត្តភាពមុនបើករដូវកាលកាលពីថ្ងៃអង្គារនៅទីក្រុងបាងកក។
បន្ទាប់ពីការប្រកួត កីឡាករអន្តរជាតិ U21 ព័រទុយហ្គាល់ ត្រូវបានគេសួរអំពីការចូលប្រឡូកក្នុងអាជីពដំបូងរបស់គាត់ ហើយគាត់បានឆ្លើយតបនៅក្នុង Anfield Watch ថា៖ «ការប្រកួតបន្ទាប់ខ្ញុំប្រាកដថាខ្ញុំនឹងស៊ុតបញ្ចូលទី»។
គួររំលឹកឡើងវិញដែរថា Carvalho បានចុះហត្ថលេខាជាមួយហង្សក្រហមនៅដើមរដូវក្ដៅនេះពីក្រុម Fulham បន្ទាប់ពីបានលេងតួនាទីយ៉ាងសំខាន់ក្នុងក្លិបទីក្រុងឡុងដ៍ ដើម្បីត្រឡប់ទៅក្របខ័ណ្ឌ Premier League កាលពីរដូវកាលមុន៕
