កីឡដ្ឋាន Estadio Santiago Bernabeu ដែលជាផ្ទះរបស់ក្លឹបបាល់ទាត់អេស្ប៉ាញ Real Madrid គឺជាកីឡដ្ឋានបាល់ទាត់ដ៏ល្អបំផុតមួយនៅក្នុងពិភពលោក។ វាមានទីតាំងនៅកណ្តាលទីក្រុងម៉ាឌ្រីដ នៅខណ្ឌ Chamartin ។ បច្ចុប្បន្នវាកំពុងស្ថិតក្នុងការជួសជុល ហើយនៅពេលដែលបានបញ្ចប់ វាត្រូវបានគេរំពឹងថានឹងក្លាយជាស្ថាបត្យកម្មដ៏អស្ចារ្យមួយ ដែលនឹងទាក់ទាញភ្ញៀវទេសចរពីជុំវិញពិភពលោក។ ប៉ុន្តែហេតុអ្វីបានជាគេដាក់ឈ្មោះថា៖ «Santiago Bernabeu»?
កីឡដ្ឋាននេះត្រូវបានដាក់ឈ្មោះតាមអតីតកីឡាករបាល់ទាត់ និងប្រធានក្លឹប Real Madrid លោក Santiago Bernabeu ។ វាត្រូវបានសាងសង់មួយផ្នែកនៅលើដីអតីតកីឡដ្ឋានដែលមានឈ្មោះថា Chamartin និង Villa Ulpina ។ Bernabeu និង Rafael Salgado បានខ្ចីប្រាក់ពីធនាគារ Mercantil e Industrial Bank ដើម្បីទិញដីនៅជាប់កីឡដ្ឋាន Chamartin ដែលជាផ្ទះរបស់ Real Madrid ។
ស្ថាបត្យករ Manuel Muñoz Monasterio និង Luis Alemany Soler បានបង្កើតទម្រង់កីឡដ្ឋានដែលត្រូវបានសម្ពោធនៅថ្ងៃទី 14 ខែធ្នូឆ្នាំ 1947 ជាមួយនឹងការប្រកួតរវាងក្រុម Real Madrid និងក្រុមព័រទុយហ្គាល់ Os Belenenses ។ ប៉ុន្តែនៅពេលនោះ កីឡដ្ឋាននេះត្រូវបានគេស្គាល់ថាជា Nuevo Chamartin ឬ New Chamartin។
នៅក្នុងខែមករាឆ្នាំ 1955 បន្ទាប់ពីការបញ្ចប់នៃការងារជួសជុលលើកដំបូង កីឡដ្ឋាននេះអាចផ្ទុកអ្នកទស្សនាបាន 125,000នាក់ ហើយត្រូវបានប្រែឈ្មោះទៅជា Santiago Bernabeu ។
លោក Santiago Bernabeu គឺជាខ្សែប្រយុទ្ធសញ្ជាតិអេស្ប៉ាញដែលបានលេងឱ្យក្រុម Real Madrid រហូតដល់ឆ្នាំ 1926 ។ បន្ទាប់ពីព្យួរស្បែកជើងរបស់គាត់ គាត់បានបន្តក្លាយជាចាត់ការក្រុម។ បន្ទាប់មកគាត់ត្រូវបានតែងតាំងជានាយកក្លឹប ហើយថែមទាំងធ្វើការក្នុងតួនាទីជាជំនួយការអ្នកគ្រប់គ្រងទៀតផង។
កំឡុងពេលលោកជាប្រធានក្លឹប Real Madrid បានឈ្នះពាន Intercontinental Cup មួយ ពាន European Cup 6 ដង ពាន League 16 ដង ពាន Spanish Cup 6 ដង ពាន Latin Cup ពីរ និង Copa Eva Duarte មួយដង។ គាត់បានទទួលមរណភាពអំឡុងការប្រកួតបាល់ទាត់ពិភពលោកឆ្នាំ 1978 ហើយ FIFA បានប្រកាសការកាន់ទុក្ខបីថ្ងៃក្នុងអំឡុងពេលការប្រកួត។
គួររំលឹកឡើងវិញដែរថា នៅឆ្នាំ 1943 លោក Santiago Bernabeu ត្រូវបានជ្រើសរើសជាប្រធានក្លឹបដែលជាតំណែងដែលគាត់បានបន្តរហូតដល់គាត់ស្លាប់នៅថ្ងៃទី 2 ខែមិថុនាឆ្នាំ 1978៕
