ខ្សែប្រយុទ្ធអេហ្ស៊ីបកីឡាករ Mohamed Salah បានបង្ហើបថាគាត់អាចចូលនិវត្តន៍ពីបាល់ទាត់ជម្រើសជាតិ បន្ទាប់ពីខកខានមិនបានចូលរួមការប្រកួត World Cup 2022 នៅប្រទេសកាតា។
កីឡាករវ័យ 29 ឆ្នាំរូបនេះមិនអាចជួយអេហ្សីបឲ្យឆ្លងផុតក្រុមសេណេហ្គាល់របស់ Sadio Mane ក្នុងការប្រកួតវគ្គ Play-off ។ បន្ទាប់ពីការប្រកួតនេះ ប្រព័ន្ធផ្សព្វផ្សាយក្នុងស្រុកបានរាយការណ៍ថា Salah បាននិយាយនៅក្នុងបន្ទប់ផ្លាស់សំលៀកបំពាក់ដែលគាត់បានស្នើថា គាត់ប្រហែលជាមិនមែនជាផ្នែកមួយនៃក្រុមនាពេលអនាគតទៀតនោះទេ។
គាត់បាននិយាយថា៖ «ខ្ញុំបាននិយាយជាមួយកីឡាករនៅក្នុងបន្ទប់ផ្លាស់សំលៀកបំពាក់មុនការប្រកួតជើងទីពីរ ហើយបានប្រាប់ពួកគេថា ខ្ញុំមានមោទនភាពដែលបានលេងជាមួយពួកគេ ហើយពួកគេគឺជាក្រុមដ៏ល្អបំផុតមួយដែលខ្ញុំបានលេងជាមួយ»។
«ខ្ញុំបានចំណាយពេលខ្លះជាមួយអ្នកជំនាន់មុនដូចជា Wael Gomaa និង Mohamed Aboutrika ក៏ដូចជាជំនាន់ Abdallah El Said ហើយខ្ញុំសប្បាយចិត្តខ្លាំងណាស់ជាមួយនឹងកីឡាករបច្ចុប្បន្ន»។
«មិនថាខ្ញុំអាចមានវត្តមាន ឬអត់នាពេលអនាគត ខ្ញុំមានមោទនភាពដែលបានធ្វើជាមិត្តរួមក្រុមរបស់អ្នក។ វាជាកិត្តិយសសម្រាប់ខ្ញុំ»។ Salah ត្រូវបានរំខានភ្លាមៗដោយមន្ត្រីអេហ្ស៊ីប ដែលទទូចថា «អ្នកនឹងនៅជាមួយយើង»។
គួររំលឹកឡើងវិញដែរថា អេហ្ស៊ីបធ្លាប់បានធ្លាក់ក្រោមថ្វីជើង សេណេហ្គាល់ ម្តងរួចមកហើយក្នុងវគ្គផ្តាច់ព្រ័ត្រនៃពានរង្វាន់ African Cup of Nations ដោយការស៊ុតបាល់ប៉េណាល់ទី។ Mane បាននិយាយពីជ័យជម្នះលើមិត្តរួមក្រុម Liverpool របស់គាត់ថា៖ «ខ្ញុំឈ្នះពីរដង ហើយគាត់ចាញ់ពីរដង ខ្ញុំមានសំណាងជាងគាត់»៕
