យោងតាមរបាយការណ៍ចុងក្រោយរបស់ Daily Mail បានឲ្យដឹងថាគោលដៅអ្នកចាត់ការទូទៅថ្មីរបស់ក្រុម Manchester United លោក Mauricio Pochettino និង Erik ten Hag កំពុងទាក់ទាញចំណាប់អារម្មណ៍ពីក្លឹបផ្សេងទៀត។ នេះមានន័យថាបិសាចក្រហមស្ថិតនៅក្រោមសម្ពាធក្នុងការសម្រេចចិត្តលើការតែងតាំងអ្នកចាត់ការថ្មីរបស់ពួកគេឲ្យបានឆាប់រហ័ស។
Pochettino និង Ten Hag ត្រូវបានគេចាត់ទុកថាជាគោលដៅដ៏លេចធ្លោរជាងគេក្នុងការចូលមកកាន់តំណែងនៅ Old Trafford ។ ក្រុមដែលគ្រប់គ្រងដោយអ្នកចាត់ការទាំងពីរបច្ចុប្បន្នកំពុងឈរលើកំពូលតារាងក្នុងលីគរៀងៗខ្លួន។ យ៉ាងណាមិញទាំង PSG និង Ajax ត្រូវបានធ្លាក់ចេញពី Champions League វគ្គ ១៦ ក្រុមកាលពីពេលថ្មីៗនេះ។
ជាពិសេស Pochettino កំពុងប្រឈមមុខនឹងសម្ពាធ ខណៈដែលមនុស្សជាច្រើនមានអារម្មណ៍ថា គាត់នឹងចាកចេញពី PSG នៅចុងបញ្ចប់នៃរដូវកាលនេះ។ ផ្ទុយទៅវិញ Ten Hag មិនមានសម្ពាធការងារនៅ Ajax ឡើយ។ ប៉ុន្តែអ្នកចាត់ការសញ្ជាតិហូឡង់រូបនេះបានត្រៀមខ្លួនរួចជាស្រេចសម្រាប់ការងារថ្មី។
ថ្មីៗនេះគាត់ត្រូវបានសម្ភាសន៍សម្រាប់ការងារនៅ Manchester United ហើយបើយោងតាមរបាយការណ៍ ការពិភាក្សារវាងភាគីទាំងពីរគឺមានភាពវិជ្ជមាន។ នៅក្នុងការអាប់ដេតចុងក្រោយបង្អស់ដែលផ្តល់ដោយលោក Chris Wheeler របស់កាសែត Daily Mail បិសាចក្រហមប្រហែលជាត្រូវធ្វើការសម្រេចចិត្តឲ្យបានឆាប់រហ័ស ខណៈដែលលោក Pochettino និងលោក Ten Hag កំពុងចាប់អារម្មណ៍ពីក្លឹបផ្សេងទៀតនៅអឺរ៉ុប។
របាយការណ៍បានបញ្ជាក់ថាគ្រូបង្វឹក PSG ត្រូវបានទាក់ទងដោយ Real Madrid ហើយ លោក Ten Hag បានជួបពិភាក្សាជាមួយក្លឹបពីរដែលលេងជាទៀងទាត់ក្នុងក្រហខ័ណ្ឌ Champions League ហើយមានការផ្តល់ជូនយ៉ាងពិសេសក្នុងចំណោមពួកគេដែលទាក់ទាញគាត់។
របាយការណ៍ក៏បានបញ្ជាក់ផងដែរថា ដំណើរការនៃការស្វែងរកអ្នកចាត់ការថ្មីនៅ Old Trafford កំពុងដំណើរការយ៉ាងល្អ ខណៈដែលគណគ្រប់គ្រងរបស់ក្លឹបបានពិភាក្សាជាមួយបេក្ខជនជាច្រើនរូប។ យ៉ាងណាមិញ វាអាចចំណាយពេលមួយរយៈ មុនពេលយើងទទួលបានការប្រកាសជាផ្លូវការពីក្លឹប៕
