ផ្ទះរបស់ខ្សែបម្រើក្រុម Manchester United កីឡាករ Paul Pogba ត្រូវបានចោរគាស់ អំឡុងពេលក្រុមរបស់គាត់ប្រកួតចាញ់ Atletico Madrid ១-០ ក្នុងការប្រកួត UEFA Champions League កាលពីថ្ងៃអង្គារ។
Pogba ចូលមកក្នុងការប្រកួតនៅនាទីទី ៦៧ ដោយខ្សែបម្រើរូបនេះបានស្ថិតក្នុងកៅអីបម្រុង។ ទោះបីជាយ៉ាងណាក៏ដោយ រូបគាត់មិនបានដឹងអំពីស្ថានការណ៍ដែលបានកើតឡើងនៅផ្ទះរបស់គាត់ អំឡុងពេលប្រកួត ខណៈក្រុមចោរបានចូលលួច អំឡុងពេលកូនរបស់គាត់កំពុងដេក។
កីឡាករវ័យ ២៩ ឆ្នាំរូបនេះបានចេញសេចក្តីថ្លែងការណ៍មួយនៅលើ Twitter របស់គាត់ ដែលរៀបរាប់លម្អិតអំពីទុក្ខលំបាកនេះថា៖ «យប់មិញ សុបិន្តអាក្រក់បំផុតរបស់គ្រួសារយើង ត្រូវបានគេដឹងថា ផ្ទះរបស់យើងត្រូវចោរចូលលួច ខណៈពេលដែលកូនរបស់យើងកំពុងដេកក្នុងបន្ទប់គេងរបស់គេ។ ចោរចូលផ្ទះយើងមិនដល់៥នាទីទេ ប៉ុន្តែនៅពេលនោះ ពួកគេបានយករបស់មានតម្លៃពីយើងជាច្រើន»។
Pogba បន្តថា៖ «រឿងនេះបានកើតឡើងនៅនាទីចុងក្រោយនៃការប្រកួត នៅពេលដែលពួកគេដឹងថាពួកយើងមិននៅផ្ទះ។ ខ្ញុំនិងភរិយាបានប្រញាប់ប្រញាល់ទៅផ្ទះដោយមិនដឹងថាកូនរបស់យើងមានសុវត្ថិភាពឬអត់។ ប្រសិនបើខ្ញុំនៅផ្ទះ ខ្ញុំមិនបារម្ភនោះទេ ហើយខ្ញុំសង្ឃឹមដោយស្មោះថា គ្មានអ្នកណាម្នាក់មានអារម្មណ៍ដូចអ្វីដែលខ្ញុំមានអារម្មណ៍កាលពីយប់នោះនោះទេ»៕
