ខ្សែការពារ Diogo Dalot បានបង្ហើបឲ្យដឹងថា ខ្សែប្រយុទ្ធ Christiano Ronaldo បានបង្កើតទម្លាប់ឲ្យរូបគេចេះផឹកកាហ្វេច្រើនជាងមុន។
គួរជម្រាបថា Dalot វិលត្រឡប់មកចូលរួមក្រុមវិញ ក្រោយចំណាយពេលមួយរដូវកាលនៅ AC Milan ម្យ៉ាងវិញទៀតរូបគេ និង Ronaldo គឺជាមិត្តរួមក្រុមជនជាតិព័រទុយហ្គាល់ដូចគ្នា ដូច្នេះទើបពួកគេមានទំនាក់ទំនងច្រើនជាមួយគ្នា។
Dalot បានបង្ហើបថា ឥឡូវនេះមុនការប្រកួត ពួកគេបាននិយាយជាមួយគ្នាយ៉ាងច្រើន ដោយជជែកគ្នាបណ្តើផឹកកាហ្វេបណ្តើ ដែលវាធ្វើឱ្យពួកយើងមានសមាធិល្អជាងមុន។
នៅក្នុងបទសម្ភាសន៍ Dalot បាននិយាយថា៖ « កីឡាករនិមួយៗ គេមានជំនឿ និងទម្លាប់ខុសៗគ្នា។ និយាយឲ្យត្រង់ទៅ ពីមុនមកខ្ញុំមិនសូវមានជំនឿ និងទម្លាប់ច្រើននោះទេ។ មុនការប្រកួតមកដល់ ពួកយើងតែងតែស្នាក់នៅសណ្ឋាគាររួមគ្នា ហើយខ្ញុំតែងតែផឹកកាហ្វេជាមួយ Christiano ជានិច្ច។ ហើយវាជាទម្លាប់ទៅហើយ គាត់បានអូសខ្ញុំ ទៅផឹកកាហ្វេជាមួយគាត់ ណាមួយខ្ញុំមិនមែនជាមនុស្សចូលចិត្តកាហ្វេឡើយ ប៉ុន្តែឥឡូវខ្ញុំចាប់ផ្ដើមផឹកកាហ្វេហើយ»៕
