អតីតតារាឆ្នើមរបស់ Liverpool លោក Jamie Carragher និយាយថា លោកមើលឃើញពីសមត្ថភាពរបស់កីឡាករវ័យក្មេង Harvey Elliott ដែលអាចជំនួស Mohamed Salah នៅក្នុងយុគថ្មី ជាមួយជម្រើសតំបន់ប្រយុទ្ធ Diogo Jota និងកីឡាករចំណូលថ្មី Luis Diaz។
Elliott បានត្រលប់មកចូលរួមការប្រកួតសម្រាប់ក្រុមហង្សក្រហមជាថ្មី ក្រោយខកខានជាច្រើនខែ ដោយសារបញ្ហារបួស កាលពីដើមរដូវកាលកន្លងទៅ ហើយគេបានក្លាយជាកីឡាករវ័យក្មេងបំផុតរបស់ Liverpool ដែលជាប់ជម្រើស១១នាក់ដំបូង នៃការប្រកួត UEFA Champions League ក្រោយត្រូវបានដាក់ឱ្យលេង ក្នុងជំនួបទល់នឹង Inter Milan។
ហើយលោក Carragher ជឿថានៅឆ្នាំក្រោយ ឬតទៅមុខទៀត Elliott នឹងចាប់ផ្ដើមស្ថិតនៅក្នុងគម្រោងរបស់អ្នកចាត់ការ Jurgen Klopp ហើយលោកជឿថា អ្នកចាត់ការរូបនេះ នឹងផ្ដល់ឱកាសឱ្យខ្សែប្រយុទ្ធវ័យក្មេងរូបនេះ បញ្ចេញឱ្យអស់នូវសក្ដានុពលដែលគេមាន។
លោក Carragher បាននិយាយថា៖ “វាធ្វើឱ្យអ្នកគិតថា Liverpool មានកីឡាករពិសេស មិនមែនត្រឹមតែជាកីឡាករល្អនោះទេ។ អ្នកមានកីឡាករពិសេសមួយរូបនៅទីនេះ ប្រហែលជាអាចជាអ្នកជំនួស Mo Salah បើនោះជាតំណែងដែលគេអាចចូលរួមបាន”។
“Mo Salah មានវ័យ៣០ឆ្នាំហើយនៅខណៈនេះ ហើយយើងទាំងអស់គ្នាមិនសូវសង្ឃឹមថាគេនឹងបន្ដកុងត្រាថ្មីឡើយ ប៉ុន្ដែនៅពេលណាដែល Mo Salah ចាកចេញ ប្រហែលជាអ្នកមានអ្នកជំនួសម្នាក់ជាស្រេច។ ប្រហែលមិនមែនជាកីឡាករក្នុងប្រភេទដូចគ្នាទេ ប៉ុន្ដែជាកីឡាករដែលលេងនៅស្លាបខាងស្ដាំ និងជំនាញជើងឆ្វេង”។
“ប្រហែលជាគេជាកីឡាករដែលបង្កើតឱកាសច្រើនជាង ឬប្រហែលជាគេមានគ្រាប់បាល់តិចជាង តើនរណាទៅដឹង ប៉ុន្ដែគេពិតជាកីឡាករពិសេសមួយរូប ហើយនៅក្នុងរយៈពេល១៨ខែចុងក្រោយ គេនឹងរកឃើញតំណែងរបស់ខ្លួននៅក្នុងក្រុម ព្រោះកីឡាករដែលមានគុណភាពបែបនេះ ត្រូវតែបានលេង”៕
