អតីតខ្សែប្រយុទ្ធក្រុម Leeds United លោក Noel Whelan ជឿជាក់ថា កំពូលតារាឆ្នើមរបស់ Liverpool គឺ Mohamed Salah នឹងសម្លឹងរកការឈ្នះពានរង្វាន់បន្ថែមទៀតក្នុងរដូវកាលនេះ បន្ទាប់ពីចាញ់ការប្រកួតវគ្គផ្តាច់ព្រ័ត្រ Africa Cup of Nations (AFCON) ឆ្នាំ ២០២២។
អេហ្ស៊ីបបានជួបសេណេហ្គាល់ក្នុងវគ្គផ្តាច់ព្រ័ត្រ AFCON ប៉ុន្តែចាញ់ដោយបាល់ប៉េណាល់ទី បន្ទាប់ពីការប្រកួតបានបញ្ចប់ក្នុងលទ្ធផល ០-០ ។ អេហ្សីបបានចាញ់ដោយបាល់កាត់សេចក្តី ប៉េណាល់ទីក្នុងលទ្ធផល ៤-២ ដោយមិត្តរួមក្រុម Liverpool របស់គាត់ Sadio Mane បានស៊ុតបាល់បញ្ចូលទីចុងក្រោយ ជួយឲ្យសេនេហ្គាល់លើកពាន។
ថ្លែងទៅកាន់ Football Insider លោក Whelan បាននិយាយថា៖ «ខ្ញុំប្រាកដណាស់ថា គាត់នឹងមិនបញ្ចប់រដូវកាលដោយគ្មានពានរង្វាន់នោះទេ។ ការចាញ់នោះនៅថ្ងៃអាទិត្យមុន ប្រហែលជានឹងផ្តល់ឱ្យគាត់នូវការតាំងចិត្តកាន់តែខ្លាំង។ គាត់អាចទៅឈ្នះពានរង្វាន់មួយចំនួនជាមួយនឹង Liverpool »។
បញ្ជាក់ផងដែរថា Salah មានរដូវកាលដ៏អស្ចារ្យសម្រាប់ហង្សក្រហមមកទល់ពេលនេះ។ ខ្សែប្រយុទ្ធរូបនេះ ស៊ុតបញ្ចូលទីបាន ២៣ គ្រាប់ និងបញ្ជូនបាល់ឱ្យមិត្តរួមក្រុមបញ្ចប់ទីចំនួន ៩ ដងក្នុងការបង្ហាញខ្លួន ២៦ ប្រកួតនៅគ្រប់ការប្រកួតទាំងអស់ក្នុងរដូវកាលនេះ៕
