ក្លិបបិសាចក្រហម Manchester United បានប្រកាសឈប់លក់អាវរបស់ Mason Greenwood តាមអនឡាញ ហើយ Nike ក៏បានប្រកាសផ្អាកទំនាក់ទំនងការងាររបស់ខ្លួនជាមួយខ្សែប្រយុទ្ធរូបនេះ បន្ទាប់ពី “ការចោទប្រកាន់” ។
គួររំលឹកថា ខ្សែប្រយុទ្ធសញ្ជាតិអង់គ្លេសវ័យ 20ឆ្នាំរូបនេះ ត្រូវបានក្លឹប Man United ព្យួរការងារកាលពីថ្ងៃអាទិត្យទី 30 ខែមករា បន្ទាប់ពីរូបភាព និងសំឡេងនៃបទល្មើសដែលត្រូវបានចោទប្រកាន់ ត្រូវបានចែកចាយនៅលើប្រព័ន្ធផ្សព្វផ្សាយសង្គម។ ហើយប៉ូលីស Greater Manchester ក៏បានបញ្ជាក់ដែរថា Greenwood ត្រូវបានចាប់ខ្លួន ក្រោមការសង្ស័យពីបទរំលោភ និងអំពើហិង្សា។
បច្ចុប្បន្ន អតិថិជនមិនអាចជ្រើសរើសឈ្មោះរបស់កីឡាករវ័យ 20 ឆ្នាំរូបនេះ ជាជម្រើសសម្រាប់ផលិតផលបានឡើយ ហើយឈ្មោះ Greenwood ក៏មិនអាចមើលឃើញនៅក្នុងបញ្ជីកីឡាករនៅលើហាងអនឡាញផ្លូវការរបស់ក្លឹបទៀតទេ។
ទន្ទឹមនឹងនោះ អ្នកនាំពាក្យរបស់ក្រុមហ៊ុនសម្លៀកបំពាក់កីឡាយក្ស Nike បានប្រាប់ Reuters ថា ៖ «យើងបានផ្អាកទំនាក់ទំនងរបស់យើងជាមួយនឹង Mason Greenwood ហើយ»។
«យើងមានការព្រួយបារម្ភយ៉ាងខ្លាំង ចំពោះការចោទប្រកាន់ដែលរំខាន ហើយនឹងបន្តតាមដានស្ថានការណ៍យ៉ាងដិតដល់»៕
