Aston Villa បានចុះហត្ថលេខាផ្ទេរខ្សែការពារ Calum Chambers ពីក្លិប Arsenal ជាមួយនឹងកុងត្រារយៈពេល ៣ឆ្នាំកន្លះ។
កីឡាករវ័យ ២៧ឆ្នាំរូបនេះ ទទួលបានឱកាសលេងបានតែ ៥លើកប៉ុណ្ណោះ សម្រាប់ក្រុមកាំភ្លើងធំរដូវកាលនេះ ស្របពេលដែលកិច្ចសន្យារបស់គេ នឹងអស់សុពលភាពនៅរដូវក្ដៅខាងមុខ ហើយអាចចាកចេញដោយគ្មានតម្លៃផ្ទេរ។
គេជាកីឡាករទី ៣ដែលចូលរួមជាមួយ Aston Villa នៅក្នុងខែមករានេះ បន្ទាប់ពីការមកដល់របស់ Philippe Coutinho ដែលខ្ចីជើងពី Barcelona និង Lucas Digne ដែលផ្ទេរពី Everton ក្នុងតម្លៃ ២៥លានផោន។
គួររំលឹកដែរថា Chambers បានមកចូលរួម Arsenal កាលពីឆ្នាំ២០១៤ ដោយផ្ទេរចេញពីក្លិប Southampton។ គេនឹងមកជំនួសតំណែងរបស់ Axel Tuanzebe ដែលខ្ចីជើងពី Manchester United ហើយផុតកុងត្រាខ្ចីកាលពីដើមខែកន្លងមក៕
