យោងតាមរបាយការណ៍ក្លិប Aston Villa បានស្នើទៅក្លិបសេះបង្កង់ Juventus ក្នុងការដេញថ្លៃការចុះហត្ថលេខាផ្ទេរខ្សែបម្រើ Rodrigo Bentancur ស្របពេលអ្នកចាត់ការ Steven Gerrard បានបង្ហាញមហិច្ឆតានាំយកកីឡាករបន្ថែមមកពង្រឹងក្រុមរបស់លោក។
ខ្សែបម្រើអ៊ុយរូហ្កាយវ័យ ២៤ឆ្នាំរូបនេះ បានផ្ទេរមកចូលរួម Juventus ក្នុងឆ្នាំ២០១៧ ហើយបានជួយពួកគេឈ្នះពាន Serie A ៣លើក។
ថ្មីៗនេះ Aston Villa ទើបតែផ្ទេរយក Philippe Coutinho ក្រោមកិច្ចសន្យាខ្ចីជើងពី Barcelona ព្រមទាំងបានចំណាយ ២៥លានផោនសម្រាប់ការផ្ទេរ ខ្សែការពារស្លាបឆ្វេង Lucas Digne ក្នុងទីផ្សារដោះដូរ។
ទោះយ៉ាងណាក្ដី Gerrard ចង់បន្ថែមសមាជិកនៅក្នុងតំបន់បម្រើសម្រាប់ក្រុម Villa ហើយការពិភាក្សាជាមួយក្លិប Juventus នឹងបន្ដនៅក្នុងសប្ដាហ៍នេះ។
គួររំលឹកថា កាលពីថ្មីៗនេះក្លិបរបស់លោក Gerrard មានការភ្ជាប់ជាមួយខ្សែប្រយុទ្ធសម្បូរបទពិសោធ Luis Suarez របស់ក្រុម Atletico Mdadrid ដែលជាមិត្តរួមក្រុមជម្រើសជាតិអ៊ុយហ្គាយរបស់ Bentancur ដើម្បីមកជួយបំពេញតំបន់ប្រយុទ្ធ។
Aston Villa ក៏បានបន្ថែមជម្រើសនៅក្នុងតំបន់អ្នកចាំទី ដោយបានខ្ចីជើងកីឡាករ Robin Olsen ពីក្លិប Roma បន្ទាប់ពីបានចំណាយពេលលើកិច្ចសន្យាខ្ចីជើងនៅ Sheffield United៕
