ជាការពិតណាស់ នៅក្នុងចំណោមកីឡាករ ៣ រូបដែល Lionel Messi បោះឆ្នោតឲ្យក្នុងនាមតំណាងឲ្យប្រធានក្រុមជម្រើសជាតិអាហ្សង់ទីន គឺគ្មានឈ្មោះ Robert Lewandowski នោះទេ ផ្ទុយទៅវិញមាន Neymar, Kylian Mbappe និង Karim Benzema។
នេះគឺផ្ទុយស្រឡះ ពីការសម្រេចរបស់ Lewandowski ដែលចំណោម ៣ រូបក៏មាន Leo Messi ម្នាក់ដែរ។ ទោះជាយ៉ាងណា ចុងក្រោយកីឡាករប៉ូឡូញរូបនេះ នៅតែក្លាយជាម្ចាស់ពានឯកត្តជន The Best Men’s Player of the Year របស់ FIFA ដែលទើបប្រកាសកាលពីថ្ងៃទី ១៧ មករា ក្នុងប្រទេសស្វីស។
យ៉ាងណាមិញ ក៏មានសំនួរពីអ្នកសារព័ត៌មាន ថាតើយល់ឃើញបែបណាក្រោយ Messi មិនបោះឆ្នោតឲ្យឈ្មោះរបស់ខ្លួន? ស្រាប់តែកីឡាកររបស់ក្លឹប Bayern Munich ឆ្លើយថា៖ «អ្នកអាចទៅសួរគាត់ដោយខ្លួនឯង កាលនៅ Ballon d’Or គាត់បោះឲ្យខ្ញុំនៅលេខរៀងទី ២ តែពេលវេលាវាខុសគ្នា ខ្ញុំអត់អាចនិយាយបែបណាទៀតទេ គ្រាន់តែថាសារនេះ ខ្ញុំក៏បោះឲ្យគាត់ឈរនៅលេខរៀងទី ២ វិញដែរ»។
គួររំលឹកថា នេះជាពានរង្វាន់ឯកត្តជន The Best លើកទី ២ ហើយសម្រាប់កីឡាករវ័យ ៣៣ ឆ្នាំរូបនេះ។ ហើយអ្វីដែលគេចាប់អារម្មណ៍បំផុត Lewandowski សារនេះបោះឆ្នោតខុសពីការយល់ឃើញរបស់មតិភាគច្រើន ដោយលោកបានដាក់ទាំងឈ្មោះ Messi និង Ronaldo នៅលេខរៀងទី ២-៣ រីឯអ្នកលេខ ១ គឺ Jorginho។ តាមពិតទៅភាគច្រើន មិនងាយមាននរណាដែលបោះឆ្នោតឲ្យទាំងឈ្មោះ Messi/Ronaldo ព្រមគ្នាបែបនេះទេ៕
