ការស្វែងរកអ្នកចាត់ការអចិន្ត្រៃយ៍របស់ Manchester United កំពុងឡើងកំដៅ។ ក្លឹបកំពុងជួបការលំបាកក្នុងការស្វែងរកទម្រង់លេងល្អបំផុតរបស់ពួកគេ ក្រោមអ្នកចាត់ការបណ្តោះអាសន្ន Ralf Rangnick ។
យោងតាមរបាយការណ៍ចុងក្រោយពី El Nacional គ្រូបង្វឹករបស់ Atletico Madrid លោក Diego Simeone បានក្លាយជាគោលដៅកំពូលរបស់ពួកគេ។ អ្នកចាត់ការសញ្ជាតិអាហ្សង់ទីន បច្ចុប្បន្នគឺជាអ្នកគ្រប់គ្រងក្លឹបដែលមានប្រាក់ខែខ្ពស់បំផុតនៅលើពិភពលោក ហើយ Manchester United មានឆន្ទៈផ្តល់ជូនគាត់នូវកិច្ចព្រមព្រៀងស្រដៀងគ្នានេះ។
កិច្ចព្រមព្រៀងដែល Man Utd គ្រោងធ្វើឡើង អាចធ្វើឲ្យគាត់ទទួលបាន ៤៨០,០០០ ផោនក្នុងមួយសប្តាហ៍។ Simeone ត្រូវបានគេរាយការណ៍ថាទទួលបានប្រាក់ចំនួន ២៥ លានអឺរ៉ូក្នុងមួយឆ្នាំនៅ Atletico ។
ចាប់តាំងពីចូលដឹកនាំក្លឹបក្នុងឆ្នាំ ២០១២ គាត់បានដឹកនាំ Atletico Madrid ឲ្យឈ្នះដល់ទៅ ៨ ពានរង្វាន់ រួមទាំងពានរង្វាន់ La Liga ពីរ និង Europa League ។ អ្នកចាតា់ករវ័យ ៥១ ឆ្នាំរូបនេះក៏បាននាំ Rojiblancos ទៅកាន់វគ្គផ្តាច់ព្រ័ត្រ Champions League ពីរលើករបស់ពួកគេផងដែរ ដែលពួកគេបានចាញ់គូប្រជែង Real Madrid ទាំងពីរលើក៕
