Anthony Martial បានឆ្លើយតបទៅកាន់អ្នកចាត់ការថ្មីរបស់ Manchester United លោក Ralf Rangnick ដោយបានអះអាងថា ខ្សែប្រយុទ្ធរូបនេះមិនចង់ចូលរួមការប្រកួតដែលស្មើ ២-២ ជាមួយ Aston Villa កាលពីថ្ងៃអាទិត្យ។
ខ្សែប្រយុទ្ធបារាំងរូបនេះ មានចចាមអារ៉ាមពាក់ព័ន្ធនឹងការចាកចេញពី Old Trafford ក្នុងខែមករានេះ ហើយ Sevilla កំពុងចាប់អារម្មណ៍លើការដាក់សំណើផ្ទេររូបគេ ប៉ុន្ដែបានបោះបង់ដោយសារការទាមទាររបស់ Man Utd ខ្ពស់ពេក។
ពេលនេះយើងមើលឃើញថា ទំនាក់ទំនងរបស់ Martial និងអ្នកចាត់ការ Rangnick ហាក់មានភាពប្រេះឆា។ នៅពេលត្រូវបានសួរពីអវត្តមានរបស់ខ្សែប្រយុទ្ធវ័យ ២៦ឆ្នាំរូបនេះ លោក Rangnick និយាយថា៖ «Martial មិនចង់មានឈ្មោះនៅក្នុងបញ្ជីក្រុមទេ។ គេគួរតែស្ថិតនៅក្នុងក្រុមជាធម្មតា។ គេមិនចង់ចូលរួម ហើយនោះជាហេតុផលដែលគេមិនមកជាមួយយើង»។
ក្រោយមក Martial បានតបតទៅនឹងអ្វីដែលអ្នកចាត់ការរូបនេះបានលើកឡើង ដោយសរសេរនៅលើគណនីបណ្ដាញសង្គមរបស់ខ្លួនថា៖ «ខ្ញុំមិនដែលបដិសេធក្នុងការលេងសម្រាប់ Man United នោះទេ។ ខ្ញុំមកទីនេះ៧ឆ្នាំមកហើយ ហើយខ្ញុំមិនដែលមិនគោរពនោះឡើយ ហើយនឹងគោរពដល់ក្លិប និងអ្នកគាំទ្រ»៕
