លោក Jurgen Klopp ទទូចថា Liverpool និង Mohamed Salah ស្ថិតក្នុងកន្លែងដ៏ល្អមួយ ដើម្បីធានាអនាគតរបស់ខ្សែប្រយុទ្ធនៅក្លឹប ខណៈដែលការចរចាកិច្ចសន្យានៅតែបន្ត។
ពិតណាស់ Salah នៅសល់កុងត្រា ១៨ ខែទៀត ហើយការនិយាយអំពីអនាគតរបស់គាត់នៅ Liverpool បានទទួលការចាប់អារម្មណ៍ខ្លាំងក្នុងសប្តាហ៍នេះ បន្ទាប់ពីគាត់បានចូលរួមក្នុងកិច្ចសម្ភាសន៍ជាមួយ GQ ហើយបានបញ្ជាក់យ៉ាងច្បាស់ថាគាត់មិនសុំ “រឿងឆ្កួតៗ” ពីក្លឹបនោះទេ។
អនាគតរបស់កីឡាករវ័យ ២៩ ឆ្នាំរូបនេះនៅ Liverpool បានក្លាយជាការពិភាក្សារបស់ក្រុមផ្សេងៗជាច្រើនក្នុងរដូវកាលនេះ ដោយ Klopp ត្រូវបានសួរអំពីស្ថានភាពនេះកាលពីថ្ងៃពុធ។
លោក Klopp បាននិយាយក្នុងសន្និសីទសារព័ត៌មានមុនការប្រកួតកាលពីថ្ងៃពុធថា “គ្មានអ្វីដែលមិននឹកស្មានដល់នោះទេ។ ខ្ញុំដឹងថា Mo ចង់នៅ ហើយយើងក៏ចង់បាន Mo ឲ្យបន្តស្នាក់នៅ។ ខ្ញុំគិតថាវាស្ថិតនៅក្នុងកន្លែងដ៏ល្អ ខ្ញុំមានភាពវិជ្ជមានខ្លាំងណាស់ចំពោះវា អ្នកគាំទ្រមិនគួរភ័យខ្លាចដូចក្នុងប្រព័ន្ធផ្សព្វផ្សាយទេ។ ពួកគេស្គាល់ក្លឹប និងស្គាល់មនុស្សដែលដោះស្រាយរឿងនៅទីនេះ។ យើងមិនអាចនិយាយអ្វីអំពីវាបានទេ”៕
