អតីតអ្នកចាត់ការក្លិប Middlesbrough លោក Neil Warnock និយាយថា លោកនឹងមិនប្ដូរខ្សែការពារណាម្នាក់ក្នុងក្រុមរបស់លោកជាមួយ Manchester United នោះទេ ខណៈដែលក្រុមបិសាចក្រហម កំពុងមានបញ្ហាច្រើននៅតំបន់ការពារ។
Man Utd បានធានាកៅអីទៅជុំទី៤ FA Cup បន្ទាប់ពីពួកគេបានយកឈ្នះ Aston Villa ដោយលទ្ធផល ១-០ ទាំងចម្រូងចម្រាស់។ ក្រុមរបស់លោក Ralf Rangnick លេងការពារពុំបានល្អនោះឡើយ ដោយបណ្ដោយឱ្យខ្សែប្រយុទ្ធ Danny Ings មានឱកាសស៊ុតបញ្ចូលទី ប៉ុន្ដែគ្រាប់បាល់ត្រូវបានច្រានចោល ក្រោយពិនិត្យ VAR។
លោក Warnock ដែលបានចាកចេញពីតំណែងនៅ Middlesbrough កាលពីខែវិច្ឆិកា បានលើកឡើងថា ក្រុមមកពីលីគទី២អង់គ្លេសមួយនេះ មានឱកាសពាក់កណ្ដាល នៅពេលដែលពួកគេជួបក្រុមជើងឯក FA Cup ១២សម័យ នៅ Old Trafford នាខែកុម្ភៈខាងមុខនេះ។
លោក Warnock បាននិយាយថា៖ “ពួកគេនឹងជួបក្រុមចាស់របស់ខ្ញុំ Middlesbrough នៅជុំបន្ទាប់នៃពានរង្វាន់ FA Cup ហើយខ្ញុំមិនប្ដូរកីឡាករណាម្នាក់នៅតំបន់ខាងក្រោយទាំងបីរបស់ Middlesbrough ដូចជា Dael Fry, Anfernee Dijksteele និង Paddy McNair នោះទេ។ ខ្ញុំគិតថាពួកគេការពារបានល្អជាងក្រុម Man United”៕
