យោងតាមរបាយការណ៍បានឲ្យដឹងថា គ្រូបង្វឹកក្រុមតោខៀវ Chelsea លោក Thomas Tuchel ចង់ហៅខ្សែការពារ Emerson Palmeiri ត្រឡប់មករួមក្រុមវិញ បន្ទាប់ពីអនុញ្ញាតិឲ្យរូបគេចាកចេញក្នុងលក្ខខណ្ឌខ្ចីជើងនៅក្លិប Lyon ឯក្របខណ្ឌ Ligue 1 ។
មុនដំបូង Chelsea មិនចង់ហៅកីឡាករសញ្ជាតិប្រេស៊ីលកាត់ អ៊ីតាលីរូបនេះមកវិញឡើយ តែដោយសារក្រុមទំនងជាទិញយកខ្សែការពារ Lucas Digne ពីក្លិបស្ករគ្រាប់ Everton មិនបាន ខណៈដែលត្រូវការខ្សែការពារជាចាំបាច់ព្រោះ Ben Chilwell បានរងរបួស និងត្រូវសម្រាកព្យាបាលរហូតដល់ចប់រដូវកាល។
គួរជម្រាបថា Palmeiri បានចូលរួមជាមួយក្លិប Lyon ក្នុងលក្ខខណ្ឌខ្ចីជើងពេញមួយរដូវកាលតែម្ដង ដោយបង្ហាញខ្លួនបាន ១៥ប្រកួត និងស៊ុតបញ្ចូលទីបាន ១គ្រាប់។
អ្នកកាសែត Fabrizio Romano បានបង្ហើបថា៖ Chelsea ព្យាយាមហៅ Emerson Palmeiri ត្រឡប់មកវិញ ដោយសារ Tuchel ចង់បានគេ។ Lyon បានបដិសេធម្ដងរួចមកហើយតែ Chelsea កំពុងចរចាម្ដងទៀត ដោយនឹងរៀបចំឲ្យមានទឹកប្រាក់សងជំងឺចិត្តផងដែរ៕
