ខ្សែការពារ Luke Shaw បាននិយាយថាក្រុមបិសាចក្រហម Manchester United នៅខ្វះភាពស្រេកឃ្លាន និងការប្ដេជ្ញាចិត្ត សម្រាប់ការបរាជ័យទល់នឹង Wolves ក្នុងដីខ្លួនឯងកាលពីយប់ថ្ងៃទី ៤ខែមករាកន្លងទៅនេះ។
កីឡាករ Joao Moutinho រកបាន១គ្រាប់នៅចុងម៉ោងនាទីទី៨២ ជួយឲ្យ Wolves បំបាក់ Man UTD ១ ទល់នឹង ០ ដែលនេះជាបរាជ័យដំបូងគេក្រោមការដឹកនាំរបស់លោក Ralf Rangnick បន្ទាប់ពីលោកបានដឹកនាំឲ្យឈ្នះ Crystal Palace ឈ្នះ Norwich ស្មើ Newcastle និងឈ្នះ Burnley រួចមក។
ដោយឡែក Shaw មើលឃើញថាបញ្ហាចំបងរបស់ក្រុមគេ មិនមែនស្ថិតលើការដឹកនាំរបស់គ្រូបង្វឹកទេ គឺកីឡាករលេងមិនចេះសាមគ្គីគ្នា ព្រមទាំងខ្វះការតាំងចិត្ត។
ថ្លែងប្រាប់ Sky Sports ក្រោយចប់ការប្រកួត Luk Shaw បាននិយាយទាំងមុខស្ងួតថា៖ «ខ្ញុំគិតថា អ្នកមិនអាចបន្ទោសទៅលើគ្រូបង្វឹកទេ។ គឺកីឡាករផ្ទាល់ ពួកយើងធ្លាប់លេងនៅទីនេះយូរមកហើយ ពួកយើងលេងនៅផ្ទះខ្លួនឯង ពួកយើងដឹងថាត្រូវលេងដោយភាពស្វិតស្វាញ និងការលើកទឹកចិត្តជំរុញខ្លួនឯង។ ប៉ុន្តែខ្ញុំគិតថាយប់នេះ គឺពួកយើងជួបនឹងភាពលំបាក។ ពួកយើងមានអារម្មណ៍ថា ឬក៏ខ្ញុំខ្លួនឯងមានអារម្មណ៍ថា ពួកយើងមិនបានសាមគ្គីគ្នានៅលើទីលាន…»៕
