Kevin Campbell បានគាំទ្រលោក Mauricio Pochettino ឱ្យក្លាយជាអ្នកចាត់ការបន្ទាប់របស់ Manchester United ។ អតីតខ្សែប្រយុទ្ធក្រុម Arsenal ជឿជាក់ថាគ្រូបង្វឹកបច្ចុប្បន្នរបស់ PSG ត្រៀមរួចរាល់សម្រាប់បិសាចក្រហម ហើយគួរតែជាជម្រើសទី១ របស់ពួកគេ។
Manchester United បានទាក់ទងជាមួយលោក Mauricio Pochettino ជាយូរមកហើយ ប៉ុន្តែមិនមានអ្វីជាផ្លែផ្កានោះទេ។ បន្ទាប់ពីការបណ្តេញលោក Ole Gunnar Solskjaer អ្នកចាត់ការសញ្ជាតិអាហ្សង់ទីនខាងលើ ត្រូវបានភ្ជាប់ម្តងទៀតជាមួយនឹងការផ្លាស់ទៅ Old Trafford ប៉ុន្តែរបាយការណ៍បានអះអាងថា PSG បានបដិសេធមិនអនុញ្ញាតឱ្យគាត់ចាកចេញនោះឡើយ។
Ralf Rangnick ត្រូវបានតែងតាំងជាអ្នកចាត់ការបណ្តោះអាសន្ន ហើយលោក Campbell ជឿជាក់ថា Pochettino គួរតែចូលកាន់តំណែងក្នុងរដូវក្តៅនេះ។ ពេលកំពុងនិយាយជាមួយ Football Insider គាត់បាននិយាយថា៖ «ខ្ញុំគិតថាឥឡូវនេះ បិសាចក្រហមគួរតែតម្រង់ឆ្ពោះទៅរក Pochettino។ គាត់អាចបង្រួបបង្រួមកីឡាករក្នុងក្លឹប ហើយពិតជាធ្វើអោយក្លឹប Man United ត្រលប់មករកភាពអស្ចារ្យវិញ។ គ្មានអ្នកណាល្អជាង Pochettino ទេ ទាក់ទងនឹងការដឹកនាំកីឡាករ និងទទួលបានល្អបំផុតពីពួកគេ។ ខ្ញុំគិតថាគាត់ស័ក្តិសមសម្រាប់ Man United»៕
