ទោះមិនបានឈ្នះពានកីឡាករល្អបំផុតប្រចាំឆ្នាំ ប៉ុន្ដែកំពូលខ្សែប្រយុទ្ធ Cristiano Ronaldo បានឈ្នះពានរង្វាន់មួយដែរ ក្នុងកម្មវិធីប្រគល់ពានរង្វាន់ Globe Soccer Awards។
ខ្សែប្រយុទ្ធព័រទុយហ្កាល់វ័យ ៣៦ឆ្នាំរូបនេះ ទទួលបានពានរង្វាន់អ្នករកគ្រាប់បាល់ល្អបំផុត នៅក្នុងប្រវត្តិសាស្ដ្រ ប៉ុន្ដែគេមិនបានទៅចូលរួមទទួលពានរង្វាន់នេះនៅទីក្រុងឌូបៃនោះឡើយ។
កីឡាកររបស់ Manchester United រូបនេះ បានយកឱកាសផ្ញើវីដេអូចំពោះការពេញចិត្តពានរង្វាន់ដែលខ្លួនបានឈ្នះ ដោយនិយាយថា៖ «គួរឱ្យស្ដាយណាស់ ខ្ញុំមិនបានទៅទីនោះ តែខ្ញុំសូមអរគុណដល់អ្នកទាំងអស់គ្នាសម្រាប់ជោគជ័យមួយនេះ ហើយខ្ញុំសង្ឃឹមថាយើងនឹងជួបគ្នានៅឆ្នាំបន្ទាប់»។
ទោះបីជា Ronaldo អវត្តមាន ប៉ុន្ដែភ្នាក់ងាររបស់ខ្សែប្រយុទ្ធវ័យ ៣៦ឆ្នាំលោក Jorge Mendes បានឡើងទៅទទួលពាននេះជំនួស ដោយភ្ជាប់មកនូវពាក្យពេជន៍មួយចំនួន ជាការអបអរលើកទឹកចិត្តអតិថិជនខ្លួនផងដែរ។
គួរជម្រាបថា ពានរង្វាន់កីឡាករល្អបំផុតប្រចាំឆ្នាំរបស់ Globe Soccer Awards បានទៅលើខ្សែប្រយុទ្ធ Kylian Mbappe ខណៈកីឡាករប្រចាំឆ្នាំរបស់អ្នកគាំទ្រ (Fan’s Player of the Year) គឺ Robert Lewandowski៕
